ԵՐԵՎԱՆ, ՍԵՊՏԵՄԲԵՐԻ 30, 24News
ՀՀ ՊՆ Դավիթ Տոնոյանը, «ՖԱՍԹ» հիմնադրամի ղեկավար Արմեն Օրուջյանը և «Հայտեք» կիբերանվտանգության կենտրոնի գործադիր տնօրեն Լևոն Պետրոսյանը սեպտեմբերի 30-ին ստորագրեցին փոխըմբռնման հուշագիր, որով ազդարարվում է «1991 ստորաբաժանման» ստեղծումը։
«Սրանով պատմական սկիզբ դրվեց շատ կարևոր մի նախաձեռնության։ Ստեղծվելու է ոլորտային ստորաբաժանում։ Այս ծրագրի շնորհիվ կիբերանվտանգության ստորաբաժանումների ժամկետային զինծառայողները հնարավորություն կունենան ստանալ գիտելիքներ, որոնք անվտանգային պրոֆիլում կարևոր դեր կխաղան», - նշեց ՊՆ մամուլի խոսնակ Արծրուն Հովհաննիսյանը։
Հովհաննիսյանի խոսքով՝ ծրագրին հետագայում կմիանան նաև այլ հիմնադրամներ և ընկերություններ։
«Պաշտպանության նախարարության հետ գործակցության շրջանակում «ՖԱՍԹ»-ը տրամադրելու է կրթական աջակցություն, դասընթացների տրամադրում», - նշեց «ՖԱՍԹ» հիմնադրամի փոխտնօրեն Դավիթ Սարգսյանը։
Դավիթ Սարգսյանի խոսքով՝ կազմակերպվելու են դասընթացներ նախազորակոչային տարիքի անձանց համար, որի տևողությունը կլինի 6 ամիս, ինչպես նաև կտրամադրվեն դասընթացներ «1991» ստորաբաժանման զինծառայողների համար։
«Այս հուշագրով ինստիտուցիոնալ սկիզբ է դրվում ՏՏ-ի կիրառմանը պաշտպանական բնագավառում, սա մեծ ապագա ունեցող ոլորտ է», - նշեց «Հայտեք»-ի գործադիր տնօրեն Լևոն Պետրոսյանը։
Լևոն Պետրոսյանը նշեց, որ առանց տարկետման իրավունք ունեցող զորակոչիկները զորացրվելուց հետո կունենան նոր մասնագիտական որակներ։