ԵՐԵՎԱՆ, ՀՈԿՏԵՄԲԵՐԻ 1, 24News
«Յուրահատուկ պայմանագիր Սինգապուրի հետ, պատմական իրադարձություն Իրանի համար և Արևմուտքի հիվանդագին արձագանքը Սերբիայի և արևելյան գործընկերների միջև սպասվող համաձայնագրերին. ՀՀ մայրաքաղաքում մեկնարկող ԵԱՏՄ գագաթնաժողովն արդեն իսկ շատ նորություններ է բերում: Գագաթնաժողովին մեծ ուշադրություն է հատկացվում ևս մեկ պատճառով՝ ԵԱՏՄ-ն շուտով կդառնա 5 տարեկան»,-գրում է ռուսական գործակալությունը:
Հոդվածագիրը նաև հիշեցնում է, որ, բացի միության անդամ երկրների ղեկավարներից, Երևան են ժամանել նաև Մոլդովայի նախագահ Իգոր Դոդոնը, Իրանի նախագահ Հասան Ռոհանին և Սինգապուրի վարչապետ Լի Սյեն Լունը, և որ, այդուամենայնիվ, Երևանում առանձնահատուկ անհամբերությամբ սպասում էին ՌԴ նախագահ Վլադիմիր Պուտինին:
«Ինչ Հայաստանում տեղի է ունեցել, այսպես կոչված, «թավշյա հեղափոխությունը», երկու երկրների առաջնորդների հանդիպումները տեղի են ունեցել կա՛մ Ռուսաստանում, կա՛մ միջազգային հարթակներում: Այդ իսկ պատճառով Պուտինի ներկայիս այցին սպասում էր թե՛ քաղաքական էլիտան, թե՛ հասարակ քաղաքացիները, որոնց համար Ռուսաստանի հետ համագործակցությունը չափազանց կարևոր է»,- գրում է «РИА Новости»-ն:
Հոդվածագիրը հիշեցնում է, որ գագաթնաժողովին սպասվում են առևտրային նոր համաձայնագրեր Սինգապուրի և Իրանի հետ։ Հոկտեմբերին ուժի մեջ կմտնի նաև Չինաստանի հետ համաձայնագիրը, որով կպարզեցվեն առևտրային գործընթացները ԵԱՏՄ երկրների և Չինաստանի միջև:
ԵԱՏՄ օրակարգում է նաև առևտրի ազատականացումն Իսրայելի հետ, իսկ մինչև տարեվերջ սպասվում է նաև ազատ առևտրի մասին համաձայնագրի կնքում Սերբիայի հետ, որից հետո սերբ արտահանողները կկարողանան ԵԱՏՄ երկրներ արտահանել սերբական կոնյակ, ծխախոտ, այծի ու ոչխարի պանիր: