Չեմ հասկանում որպես դեմարշ՝ չքվեարկած տիկնոջը. բարդույթներ ունենալը թուլության նշան է

ԵՐԵՎԱՆ, ՀՈԿՏԵՄԲԵՐԻ 23, 24News

Հասարակություն

Խորհրդարանը քվեարկեց կողմ. Կենդանիների հանդեպ դաժան վերաբերմունքը քրեականացվեց. Այս մասին ֆեյսբուքյան իր էջում գրել է ԲՀԿ խմբակցության պատգամավոր Նաիրա Զոհրաբյանը:

Նա, մասնավորապես, նշել է.

«Քիչ առաչ խորհրդարանը 99 կողմ ձայնով վերջնական ընթերցմամբ ընդունեց կենդանիների հանդեպ դաժան վերաբերմունքը քրեականացնելու իմ եւ իմ գործընկերների ներկայացրած նախագիծը։

Ես այս նախագծի ընդունումը համարում եմ այս խորհրդարանի ամենակարեւոր քայլերից մեկը։ Շնորհակալ եմ բոլոր կենդանասերներին եւ կենդանիների պաշտպանության կազմակերպություններին՝ ամենօրյա աջակցության համար։ Բրավո մեր հասարակությանը՝ այս նախագծի հանրային աննախադեպ աջակցության համար։

Չեմ հասկանում եւ չեմ ուզում հասկանալ դեմ քվեարկած 4 պատգամավորներին եւ դահլիճում նստած, բայց որպես դեմարշ՝ չքվեարկած տիկնոջը։ Անհասկանալի բարդույթներ ունենալը թուլության նշան է։

Այս նախագիծը ինձ համար առաջին հերթին նախագիծ է մարդու՝ մարդ լինելու մասին։

Բրավո՝ կողմ քվեարկած բոլոր պատգամավորներին։

Մեր երկրում կենդանիները այլեւս պաշտպանված են լինելու անմարդկային մարդկանցից»:

Նշենք, որ ԱԺ-ն այսօր երկրորդ ընթերցմամբ ընդունեց կենդանիների նկատմամբ դաժան վերաբերմունքը քրեականացնող նախագիծը, որի հեղինակն էր ԲՀԿ խմբակցության անդամ Նաիրա Զոհրաբյանը։ Օրինագծին կողմ քվեարկեց 99, դեմ՝ 4 պատգամավոր: