ԵՐԵՒԱՆ, 23 ՀՈԿՏԵՄԲԵՐ, 24News
Եվրասիական տնտեսական միությունն ու Աֆրիկյան միությունը, որի անդամ են մայրցամաքի 55 երկրներ, Սոչիում՝ «Ռուսաստան-Աֆրիկա» գագաթնաժողովի շրջանակներում կստորագրեն փոխըմբռման հուշագիր։ Այս մասին ռուսաստանյան РБК պարբերականին հայտնել է Եվրասիական տնտեսական հանձնաժողովի նախագահ Տիգրան Սարգսյանը։
«Հուշագիրը հնարավորություն կտա ԵԱՏՄ-ի և Աֆրիկյան միության միջև ստեղծել ինստիտուցիոնալ համագործակցության մեխանիզմներ։ Մեզ հետաքրքիր է Աֆրիկյան միությունը որպես արագ զարգացող մեծ տնտեսական շուկա 1,3 մլրդ բնակչությամբ։ Զարգացման տեմպերը վկայում են, որ առաջիկայում Աֆրիկան կվերածվի համաշխարհային հզոր տնտեսական գործոնի», - նկատել է ԵՏՀ նախագահը։
Ըստ Տիգրան Սարգսյանի, ԵԱՏՄ անդամ պետությունները Աֆրիկայում կարող են զարգացնել այնպիսի տնտեսական ուղղվածության համագործակցություն, ինչպիսիք ավտոարտադրությունն է, լեռնահումքային ոլորտը, ատոմային ենթակառուցվածքները, ոսկերչական ոլորտը և այլն։
«Աստիճանաբար, Աֆրիկան կբացահայտվի մեզ համար նոր տեսանկյունից, քանի որ բացառապես բոլոր աֆրիկյան երկրներն ունեն տնտեսական բարեփոխումների բավական հավակնոտ ծրագրեր։ Նրանք բաց են արտաքին աշխարհի հետ աշխատելու համար, և այս առումով մեզ անհրաժեշտ է հայտնվել ճիշտ ժամին ու ճիշտ տեղում», - ընդգծել է ԵՏՀ նախագահը։
Եվրասիական տնտեսական միությունը վերջին տարիներին ազատ առևտրի գոտի ստեղծելու բանակցություններ է վարել տասնյակ երկրների և տնտեսական միությունների հետ։ Այսպես, ԵԱՏՄ-ն արդեն ունի ազատ առևտրի պայմանագրեր Սինգապուրի և Իրանի հետ։ Վերջնական փուլ են մտնում Եգիպտոսի, Սերբիայի, Իսրայելի հետ աշխատանքները։
Բոլոր այս աշխատանքներն ընթացել են այն շրջանում, երբ Եվրասիական տնտեսական հանձնաժողովը ղեկավարել է ՀՀ նախկին վարչապետ Տիգրան Սարգսյանը։