ԵՐԵՎԱՆ, ՀՈԿՏԵՄԲԵՐԻ 24, 24News
«Գազի սակագնի փոփոխության հայտը ներկայացնելուց հետո Հանրային ծառայությունների կարգավարող հանձնաժողովն ունի 80 աշխատանքային օր հայտը նայելու համար, այնուհետեւ նոր սակագինը ուժի մեջ է մտնում դրանից 30 օր հետո»,- Բարձրավոլտ էլեկտրացանցեր ՓԲԸ-ի «Հաղթանակ» ենթակայանի բացման արարողության ժամանակ լրագրողների հետ զրույցում նշեց ՀԾԿՀ նախագահ Գարեգին Բաղրամյանը:
Հարցին՝ հնարավոր է՞, որ այս տարի գազի գինը բարձրանա, վերջինս պատասխանեց. «Դա կախված է, թե ինչ պայմանավորվածություններ կունենանք: Համենայնդեպս, մենք բանակցում ենք ավելի երկարաժամկետ գնային քաղաքականություն ունենալու համար: Եթե պետք է գնանք մեկ տարվա սակագնի վերանայման, դա պետք է լինի հայտի ուսումնասիրության արդյունքում: Քանի որ արդեն նոյեմբերն է մոտենում, այս տարի չենք կարող նոր գին ունենալ»:
Նա նաև նշեց, որ բանակցություններում խոսքը 5-10 տարի ժամկետի մասին է:
Հարցին՝ ի՞նչ կտա նոր ենթակայանը, արդյոք դա կազդի սակագնի վրա, նա պատասխանեց. «Կոնկրետ այս էլեկտրակայանը Բարձրաոլտ էլեկտրացանցերի ենթակայան է, որը վերազինվում է: ԲԷՑ-ում ենթակայանները հիմնականում վերազինվում են դոնոր բանկերի, պետության երաշխիքով վերցրած վարկերով է արվում: Կառուցվում են եւս երկու ենթակայաններ. Մեկը կառուցվում է Իրան-Հայաստան էլեկտրահաղորդման գծի ընդհանուր ծրագրի շրջանակներում»: