Ոչ ոք Հայաստանից հիասթափված դեռ չի գնացել․ «National Geographic Traveler»-ի անդրադարձը

ԵՐԵՎԱՆ, ՀՈԿՏԵՄԲԵՐԻ 26, 24News

պն

Ռուսական «National Geographic Traveler»-ը Հայաստանի մասին փորձագետներից ու տեղացիներից հավաքագրել է բազմաթիվ խորհուրդներ ու տեղեկություններ, որոնք հնարավորություն են տալիս ճանաչելու երկրի չբացահայտված կողմերը:  

Ըստ «Արմենպրես»-ի, հոդվածը սկսվում է Երեւանից: «Օրը Երեւանում հաճելի է սկսել մեկ բաժակ սուրճով: Ամռանը ցանկալի է դուրս գալ փողոց վաղ առավոտյան, քանի դեռ օրը չի տաքացել, շատ մարդ էլ չկա: Հաճելի է տեսնել, թե ինչպես է քաղաքն արթնանում»,-ասված է հոդվածում: Հեղինակն առաջարկում է լինել Կասկադ համալիրում, Հանրապետության հրապարակում, Մարզահամերգային համալիրում: Նաեւ այցելել Էրեբունի արգելոց թանգարան, լավ երաժշտություն լսել «Մալխաս» ակումբում, բարձորակ գինի խմել Սարյան փողոցի գինետներում:   

Հրապարակման մեջ Երեւանից դուրս ներկայացվում են Հայաստանի մյուս քաղաքները Գյումրին, Վանաձորը, Դիլիջանը, Սեւանն իրենց գեղատեսիլ վայրերով, պատմամշակութային հուշարձաններով, եկեղեցիներով, խաչքարերով:

Գյումրին ներկայացվում է մի վայր, որտեղ պահպանվել է պատմությունը: Քաղաքի մասին շատ տեղեկություններ ստանալու համար խորհուրդ է տրվում այցելել Գյումրու ժողովրդական ճարտարապետության եւ քաղաքային կենցաղի թանգարան: Առանձին անդրադարձ է կատարվում Մհեր Մկրտչյանի տուն-թանգարանին:

«Հայաստանը միշտ առանձնացել է իր հյուրասիրությամբ եւ աչքի ընկել համեղ խոհանոցով: Բազմազան ուտեստներն ու կոնյակը, գինին անտարբեր չեն թողել ոչ մեկին: Թերեւս ոչ ոք Հայաստանից հիասթափված դեռ չի գնացել»,-ասված է հոդվածում: Տոլմա, խորոված, իշխան ձուկ, լավաշ, տեղական պանիր, սպաս եւ այլն, հայկական խոհանոցն առաջարկում է լայն ընտրության հնարավորություն: Հեղինակը նկատում է, որ վերջին տարիներին Երեւանում բացվել են ռեստորաններ, որտեղ ներկայացվում է նաեւ սիրիական խոհանոցը:

Ինչ տանել Հայաստանից. հոդվածագիրը խորհուրդ է տալիս կերամիկա, գինի, փայտե նարդի, օբսիդիանե զարդատուփեր, գորգեր:

«Սրանք միայն հուշանվերների մի փոքր մասն են, որոնք կարելի է ձեռք բերել: Այստեղ կան նաեւ շատ տաղանդավոր նկարիչներ. Նրանց գործերը կարելի է գնել քաղաքի ոչ մեծ պատկերասրահներում, Երեւանի Վերնիսաժում կամ Մարտիրոս Սարյանի անունը կրող պուրակում: Նկարները գրեթե ամեն օր ցուցադրվում են»,-ասված է հոդվածում: