ԵՐԵՎԱՆ, ՀՈԿՏԵՄԲԵՐ 28, 24News
Մոսկվայում տեղի է ունեցել ՀԱՊԿ անդամ պետությունների՝ թմրամիջոցների անօրինական շրջանառության հակազդման ուղղությամբ իրավասու մարմինների ղեկավարների համակարգող խորհրդի 21-րդ նիստը, որին մասնակցել է ՀՀ ոստիկանության Կազմակերպված հանցավորության դեմ պայքարի գլխավոր վարչության պետի ժամանակավոր պաշտոնակատար Արթուր Մարտիրոսյանը։
Ինչպես տեղեկացրին ՀՀ ոստիկանության հասարակայնության հետ կապերի և լրատվության վարչությունից, նիստի ընթացքում ամփոփվել են ընթացիկ տարի թմրամիջոցների անօրինական շրջանառության դեմ համատեղ պայքարի արդյունքները։ Կողմերը, կարևորելով համատեղ աշխատանքը, հայտնել են համագործակցային դաշտն առավել ընդլայնելու պատրաստակամություն։ Առանձնահատուկ քննարկման առարկա է դարձել պայքարի ոլորտում իրականացվող ռազմավարությունը, նոր մեխանիզմների մշակումն ու կիրարկումը։ Այս համատեքստում հնչել են առաջարկություններ։ Նիստի ավարտին կազմվել է համապատասխան արձանագրություն ու որոշում։