ԵՐԵՎԱՆ, ԴԵԿՏԵՄԲԵՐԻ 16, 24News
ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը՝ անդրադառնալով հոր առողջական վիճակին, լրագրողներին ասել է, որ առողջական լուրջ խնդիրներ չկան։
«Հետվիրահատական որոշ բաներ պետք է արվեր, լուրջ բան չկա», - ասել է Լևոն Քոչարյանը, նաև հավելել, որ հայրն այս օրերին հետվիրահատական բուժզննում է անցնում «Իզմիրլյան» ԲԿ-ում։
Քոչարյանի որդին նաև ասել է, որ տեղյակ չէ՝ ինչո՞ւ փաստաբան Հայկ Ալումյանը միջնորդեց, որ դատական նիստի մի հատված լինի դռնփակ։
«Ինձ համար անակնկալ էր», - ասել է Լևոն Քոչարյանը, ապա հավելել, որ այս գործով իշխանությունը հստակ թելադրել է իր ցանկությունը։
«Բոլորը դա գիտեն, կա նաև Դավիթ Գրիգորյանի օրինակը, ավելի մեծ ճնշում, քան դա, երևի թե, չկա», - ասել է Լևոն Քոչարյանը։ Նա նաև նշել է, որ խնդիր չեն տեսնում նրանում, որ Քոչարյանն Ամանորը դիմավորելու է կալանավայրում։
«Պայքար է, պայքարի մեջ ենք, հասկանում ենք, որ իշխանությունն իր կամքն է թելադրում ու դատական համակարգի մի մասը դեռևս ենթարկվում է էդ ամեն ինչին։ Պատրաստ ենք պայքարի, շարունակելու ենք մինչև վերջ, մինչև որ արդարությունը վերականգնվի», - ասել է Քոչարյանի որդին։