ԱԱԾ-ում քրեական գործ է հարուցվել գլխավոր դատախազին զրպարտելու համար

ԵՐԵՎԱՆ, ՀՈՒՆՎԱՐԻ 20, 24News

Արթուր

ՀՀ գլխավոր դատախազի խորհրդական Գոռ Աբրահամյանը ֆեյսբուքյան իր էջում տեղեկացրել է, որ ՀՀ գլխավոր դատախազին զրպարտելու համար ԱԱԾ-ում քրեական գործ է հարուցվել:

«Ստի ոտքը իսկապես կարճ է: Նման պրիմիտիվ մանիպուլյացիաներինը՝ ևս»,- գրել է նա:

Աբրահամյանը տարածել է Araratnews.am-ին դատախազության կողմից տրված պարզաբանումը, որ վերաբերում է նախորդ տարի իրավապաշտպան Արտակ Գալստյանի ու փաստաբան Սուսաննա Սարգսյանի հրապարակած տեղեկությանը, թե ՀՀ գլխավոր դատախազ Արթուր Դավթյանն ու ՀՀ գլխավոր մանկաբարձ, երեխաների վաճառքի համար մեղադրվող Ռազմիկ Աբրահամյանը հանդիպել են:

Դատախազությունից հայտնել են, որ ԱԱԾ-ն գործի քննությունն ավարտել է:

«… Նյութերի նախապատրաստման ընթացքում ԱԱԾ հրավիրված Ա. Գալստյանը հրաժարվել է հանցագործության մասին հաղորդում տալուց՝ քննությանը հայտնելով իր տեղեկությունների աղբյուրները:

Ձեռնարկված քննչական, դատավարական միջոցառումներով պարզվել է, որ հաղորդման մեջ նշված վայրում Ռ. Աբրահամյանը հանդիպումներ է ունեցել ոչ թե գլխավոր դատախազի, այլ իր իրավաբանի հետ, և տվյալ հանգամանքն ակնհայտ է եղել տեղեկություն տարածողի համար:

Ավելին, ձեռնարկված օպերատիվ-հետախուզական միջոցառումներով ՀՀ գլխավոր դատախազի կողմից նշված վայր այցելելու և այնտեղ Ռազմիկ Աբրահամյանի, Լիաննա Կարապետյանի և այլ անձանց հետ հանդիպումներ ունենալու վերաբերյալ առհասարակ որևէ տվյալ չի ստացվել»,- հայտնել են դատախազությունից: