Վերաքննիչ վարչական դատարանի 3 աշխատակիցները տույժի են ենթարկվել․ մեկը հեռացվել է

ԵՐԵՎԱՆ, ՓԵՏՐՎԱՐԻ 12, 24News

վարչականդատարան

ՀՀ վերաքննիչ վարչական դատարանի աշխատակազմի գրասենյակի աշխատակիցների կողմից ծառայողական պարտականություններն անհարգելի պատճառով ոչ պատշաճ կատարելու հետ կապված հարցերի պարզաբանման նպատակով Դատական դեպարտամենտի ղեկավարի 26.12.2019 թվականի թիվ 1189-Ա հրամանով նշանակվել էր ծառայողական քննություն:

Արդյունքում, հիմք ընդունելով Դատական դեպարտամենտի ղեկավարի համապատասխան հրամանով ձևավորված հանձնաժողովի եզրակացությունը, ծառայողական քննության նյութերը և համաձայն «Հանրային ծառայության մասին» օրենքի 19-րդ հոդվածի 1-ին մասի 1-ին և 4-րդ կետերի, «Դատական դեպարտամենտում ծառայության մասին» օրենքի 9-րդ հոդվածի 4-րդ մասի 3-րդ կետի, 22-րդ հոդվածի 1-ին մասի 2-րդ կետի, 29-րդ հոդվածի, «Քաղաքացիական ծառայության մասին» օրենքի 21-րդ հոդվածի 1-ին մասի, 2-րդ մասի 1-ին կետի «բ» ենթակետի, 2-րդ կետի «ա», «գ» ենթակետերի, 3-րդ և 6-րդ մասերի, 22-րդ հոդվածի 8-րդ մասի, ՀՀ կառավարության 2018 թվականի հուլիսի 19-ի թիվ 814-Ն որոշման և ՀՀ դատարանների նախագահների խորհրդի 2007 թվականի դեկտեմբերի 21-ի թիվ 23-Լ որոշման 1-ին հավելվածի 1-ին բաժնի 5-րդ կետի, 2-րդ բաժնի 3-րդ կետի, 3-րդ բաժնի 7-9-րդ և 11-րդ կետերի, Դատական դեպարտամենտի ղեկավարի հրամաններով՝ ծառայողական պարտականություններն անհարգելի պատճառով ոչ պատշաճ կատարելու հիմքով` ՀՀ վերաքննիչ վարչական դատարանի աշխատակազմի գրասենյակի աշխատակիցների նկատմամբ կիրառվել են կարգապահական տույժի հետևյալ տեսակները՝

1. ՀՀ վերաքննիչ վարչական դատարանի աշխատակազմի գրասենյակի պետ Լիլիթ Բադալյանին հայտարարվել է խիստ նկատողություն:

2. ՀՀ վերաքննիչ վարչական դատարանի աշխատակազմի գրասենյակի գլխավոր մասնագետի պարտականությունները ժամկետային աշխատանքային պայմանագրով կատարող Միրա Դանիելյանին հայտարարվել է նկատողություն:

3. ՀՀ վերաքննիչ վարչական դատարանի աշխատակազմի գրասենյակի առաջատար մասնագետ Անահիտ Երվանդյանի նկատմամբ կիրառվել է կարգապահական տույժ՝ ծառայության դադարեցման տեսքով և վերջինս 2020 թվականի փետրվարի 11-ից ազատվել է զբաղեցրած պաշտոնից: