ԵՐԵՎԱՆ, ՄԱՐՏԻ 19, 24News
«Երևանի քաղաքապետարանը հաջորդ շաբաթ մրցույթ կհայտարարի 100 նոր ավտոբուսի գնման վերաբերյալ»։ Այս մասին Երևանի ավագանու հերթական նիստի ժամանակ հայտնել է Երևանի փոխքաղաքապետ Հայկ Սարգսյանը: Նա անդրադարձել է Երևանի ավագանու «Լույս» խմբակցության ղեկավար Դավիթ Խաժակյանի այն հարցին, թե ինչո՞ւ չի կատարվել մինչև 2020 թվականի փետրվարի վերջ 100 նոր ավտոբուսներ ձեռք բերելու խոստումը:
«Պետք է մրցույթ հայտարարվեր, ինչը չի արվել։ Գնումը դեռ արված չէ, և դրա կապակցությամբ քաղաքապետարանը որևէ տեսակետ չի ներկայացրել, որևէ պարզաբանում չի տվել»,- նշեց Խաժակյանը՝ փոխքաղաքապետին խնդրելով ներկայացնել տրանսպորտային համակարգի ներդրման գործընթացի վերաբերյալ որոշ մանրամասներ։
Փոխքաղաքապետն նշել է, որ մրցույթի չհայտարարման պատճառը տեխնիկական հանգամանքներն էին:
«Տեխնիկական պատճառներով մենք հնարավորություն չէինք ունեցել փորձագետներին հյուրընկալել Երևանում։ Մարտի 18-ին արդեն քննարկում ենք ունեցել մեր գործընկերների՝ մասնագետների հետ, ովքեր նայում են տեխնիկական բնութագիրը, և ըստ դրա հաջորդ շաբաթվա վերջին կհայտարարվի մրցույթ»,- ասել է Սարգսյանը։