Առաջնորդվելու ենք ֆինանսական կայունության ապահովման անհրաժեշտությամբ. ԿԲ

ԵՐԵՎԱՆ, ՄԱՐՏԻ 19, 24News

կբ

Աշխարհում COVID-19-ի տարածմամբ պայմանավորված՝ մեծացել են տնտեսական ակտիվության եւ դրա հեռանկարի վերաբերյալ անորոշությունները, որի հետեւանքով ավելացել են նաեւ մակրոտնտեսական կայունության ապահովման մարտահրավերները, հաղորդում է ՀՀ Կենտրոնական բանկը:

Այս իրավիճակում, ՀՀ կենտրոնական բանկը, կարգավորողի եւ վերահսկողի իր գործառույթներն իրականացնելիս, առաջնորդվելու է հիմնական նպատակ հանդիսացող ֆինանսական կայունության ապահովման, ֆինանսական համակարգի գործունեության անընդհատության պահպանման անհրաժեշտությամբ՝ միաժամանակ հավասարակշռելով իր գործողությունները տնտեսական ակտիվության պահպանման համատեքստում։

Նշված նպատակների համար ՀՀ կենտրոնական բանկը տիրապետում է ֆինանսական կայունության ապահովման լայն գործիքակազմի (իրացվելիության տրամադրման գործիքներ, մակրոպրուդենցիալ եւ տնտեսական նորմատիվներ), որոնք ըստ անհրաժեշտության կիրառվում են Կենտրոնական բանկի կողմից ֆինանսական համակարգի վրա հնարավոր անբարենպաստ ազդեցությունները  կլանելու կամ մեղմելու համար։ Իրադարձությունների հետագա ընթացքի տարբեր փուլերում Կենտրոնական բանկը դիտարկում է նաեւ բոլոր կողմերի շահերը հավասարակշռող մոտեցումների կիրառում։

Իրականացվող քաղաքականության արդյունավետության համար Կենտրոնական բանկը մշտապես հաղորդակցվում է բանկերի, վարկային կազմակերպությունների եւ ֆինանսական շուկայի մյուս մասնակիցների հետ, ինչպես նաեւ կարեւորում վերջիններիս սերտ եւ թափանցիկ հաղորդակցումը իրենց հաճախորդների հետ։

Հիշեցնենք նաեւ, որ Կենտրոնական բանկի եւ ֆինանսական կազմակերպությունների սերտ համագործակցության եւ օպերատիվ գործողությունների արդյունքում բոլոր այն քաղաքացիները, ովքեր տարբեր անհաղթահարելի` իրենցից անկախ հանգամանքների բերումով վարկային պարտավորությունները պայմանագրին համապատասխան կատարելու խնդիրների առջեւ են կանգնել, հնարավորություն ունեն դիմել իրենց սպասարկող կազմակերպությանը իրենց վարկային պարտավորությունների համար անհատական մոտեցում կիրառելու նպատակով։ Արդյունքում՝ ֆինանսական կազմակերպության կողմից հաճախորդի դրամական հոսքերի գնահատման հիման վրա կարող է ձեռք բերվել երկկողմ համաձայնություն, այնպես որ հաճախորդի վարկային բեռը կտրուկ չավելանա եւ ժամանակավոր դժվարությունները բացասաբար չանդրադառնան վերջինիս վարկային պատմության վրա։

Միեւնույն ժամանակ, նպատակահարմար ենք համարում հնարավորության դեպքում ֆինանսական կազմակերպությունների եւ հաճախորդների միջեւ հաղորդակցումն իրականացնել հեռախոսազանգերի կամ նամակագրության միջոցով, ինչպես նաեւ հորդորում ենք քաղաքացիներին ֆինանսական գործառնություններ իրականացնելիս հնարավորինս օգտվել բանկային էլեկտրոնային ծառայություններից (վճարային հավելվածներ, առցանց բանկային ծառայություններ):

Լուրեր Հայա

Տեսանյութեր

Live

Լրահոս