ԵՐԵՎԱՆ, ՄԱՐՏԻ 27, 24News
Արցախում տեղի ունենալիք նախագահական և խորհրդարանական ընտրությունների վերաբերյալ «Անկախ»-ին իր տեսակետն է հայտնել ԱԺՄ նախագահ, «Վերնատուն» հասարակական-քաղաքական ակումբի նախագահ Վազգեն Մանուկյանը և նշել, որ, ճիշտ է, շատ կարևոր է Արցախի խորհրդարանի կազմը, բայց ընտրությունների կարևորագույն արդյունքն այն է, թե ով կդառնա Արցախի Հանրապետության նախագահ։
«Թեկնածունների մի մասին անձամբ ճանաչում եմ և խորին հարգանքով եմ վերաբերվում, բայց որպես ընտրող՝ կառաջնորդվեի հետևյալ սկզբունքներով․
1․ Արցախի կարևորագույն հարցն անվտանգությունն է, և Արցախի նախագահը պետք է ունենա որոշակի փորձառություն անվտանգության հարցում, ռազմական գործում և վայելի ժողովրդի վստահությունն այս հարցերում։
2․ Պետք է լինի ազնիվ իր անցած ճանապարհով։ Ունենալով ղեկավարման փորձ՝ համատեղած չլինի պետական պաշտոնը բիզնեսի հետ։
3․ Պետք է լինի անկախ, չգտնվի օտար երկրների տարբեր կառույցների ազդեցության տակ։
4․ Պետք է կարողանա, ձևավորելով արդյունավետ կառավարություն, իր շուրջ համախմբել հասարակության տարբեր շերտերի, քաղաքական տարբեր ուժերի, օգտվել մասնագետների խորհուրդներից տարբեր ասպարեզներում՝ չբաժանելով հասարակությանը յուրայիների և ոչ յուրայինների»,- նշել է բանախոսը։
Վազգեն Մանուկյանը միաժամանակ ընդգծել է՝ ինքը հատուկ չի նշում, որ ընտրված նախագահը պետք է սերտորեն համագործակցի Հայաստանի ղեկավարության հետ, որովհետև ինչպես Հայաստանի, այնպես էլ Արցախի ցանկացած իշխանության դեպքում երկու երկրների ղեկավարները, անկախ իրենց քաղաքական համակրանքներից կամ ցանկություններից, պարտադրված կլինեն համագործակցել։ Սա շատ պարզ քաղաքական իրողություն է։
«Այս պայմանների մի մասը բավարարող թեկնածուներ, իհարկե, կան, բայց միայն Վիտալի Բալասանյանն է ամբողջովին բավարարում իմ նշած բոլոր սկզբունքներին։ Եվ եթե ես լինեի Արցախի քաղաքացի, առանց վարանելու ձայնս կտայի նրան։ Իսկ թե իրականում ի՞նչ սկզբունքներով կառաջնորդվի Արցախի ընտրողը, և արդյունքում ո՞վ կընտրվի Արցախի Հանրապետության նախագահ, դա Արցախի ժողովրդի իրավունքն է, և ես, ինչպես նաև Հայաստանի ամբողջ ժողովուրդը, հարգանքով կընդունենք արցախցիների ընտրությունը»,- ասել է Վազգեն Մանուկյանը։