Ցլիկը գողացել են ու Արմավիրի մարզում վաճառել. կենդանին վերադարձվել է տիրոջը

ԵՐԵՎԱՆ, ԱՊՐԻԼԻ 1, 24News 

Մարտի 3-ին ոստիկանության Գյումրի քաղաքի Մուշի բաժնում գողության վերաբերյալ հաղորդում էր ստացվել։ Դեպքի վայր մեկնած օպերատիվ խումբը պարզել էր, որ Գյումրու Իսահակյան փողոցի շինություն մտել էին պատուհանով, որը բացել էին տեխնիկական միջոցների գործադրմամբ։

Գողացել էին գազի կաթսա, ջեռուցման 51 մարտկոց, սալիկներ, էլեկտրական շաղափ եւ այլն։ Դեպքի առթիվ տարածքային քննչական բաժնում քրեական գործ էր հարուցվել, որի շրջանակներում Մուշի ոստիկանները ձեռնարկել էին օպերատիվ-հետախուզական միջոցառումներ։

Բացահայտման աշխատանքին միացել էին ոստիկանության Կումայրիի բաժնի ծառայողները, որոնք մարտի 28-ին հանցագործությունը կատարած անձանց ինքնության վերաբերյալ փաստական տվյալներ ձեռք բերեցին։ Տեղեկությունների իրացման արդյունքում Գյումրիի բնակիչներ 27 եւ 45-ամյա տղամարդիկ հայտնաբերվեցին ու կասկածանքով բերման ենթարկվեցին։ Նրանք տվեցին խոստովանական բացատրություն։

Հետագա միջոցառումներով իրավապահները հայտնաբերեցին Արմավիրի մարզում վաճառված գողոնի մի մասը։

Փաստական տվյալներ են ձեռք բերվել նաեւ, որ բերման ենթարկվածները մարտի 26-ին, դարձյալ տեխնիկական միջոցների գործադրմամբ, բացել են Շիրակ գյուղի անասնագոմի դուռն ու ցլիկ գողացել, որը եւս տեղափոխել են Արմավիրի մարզ ու վաճառել։ Կենդանին հայտնաբերվել եւ վերադարձվել է տիրոջը։

Դեպքերի հանգամանքները քննությամբ պարզվում են։