Տարեցների համար դեղորայքը հիվանդանոցից կարող են ստանալ նաև ընտանիքի անդամները. «Փաստ»

ԵՐԵՎԱՆ, ԱՊՐԻԼԻ 7, 24News

տարեց

«Փաստ» թերթը գրում է. «Որոշ հիվանդություններ, այդ թվում՝ շաքարային դիաբետ ունեցող անձինք իրենց հասանելիք անվճար դեղամիջոցները որոշակի պարբերականությամբ ստանում են այն պոլիկլինիկաներից կամ հիվանդանոցներից, որտեղ գրանցված են: Այս օրերին մենք զանգեր ենք ստանում տարբեր քաղաքացիներից, որոնք խնդրում են համապատասխան կառույցներից ճշտել՝ արդյոք որևէ կարգ գործո՞ւմ է կարանտինի օրերին դեղերն առաքելու կամ այլ տարբերակով դրանք ստանալու համար, քանզի իրենք գտնվում են ռիսկային գոտում, առավել ևս, որ նրանց մեջ քիչ չեն տարեցները:

ՀՀ վարչապետի մամուլի քարտուղար, պարետատան մամուլի հետ կապերի պատասխանատու Մանե Գևորգյանը «Փաստի» հետ զրույցում նշեց. «Արտակարգ դրության սկսվելու օրվանից ի վեր պարետատունն ամենաշատը մտածում է ավելի տարիքով մարդկանց առողջ ու լավ լինելու մասին:

Նրանք շարունակում են ստանալ իրենց բուժումը, դեղորայքը: Ինչ վերաբերում է հիվանդանոց կամ պոլիկլինիկա գնալուն, ապա նրանք, ովքեր պետք է գնան հիվանդանոց, քանի որ այլ պայմաններում հնարավոր չէ, գնում են հիվանդանոց, նրանք, որոնց հնարավոր է դա տուն հասցնել, դա էլ է արվում:

Գիտեմ, որ շատերն իրենց ընտանիքի անդամների միջոցով են ստանում և փոխանցում դեղերը: Այդ մասին բազմիցս հայտարարվել է: Ի սկզբանե, երբ սահմանափակումներ էին դրվում, այդ մասով սահմանափակումները հանվել են, որ ընտանիքի անդամները կարողանան դեղորայք կամ խիստ անհրաժեշտ այլ բաները՝ սննդից սկսած, հասցնել իրենց ավելի տարեց հարազատներին: Ամեն օրվա կտրվածքով այս պահին ամենաշատն ուշադրության կենտրոնում տարեցների թիրախային խումբն է, որպեսզի այնպես արվի, որ նրանց տեղաշարժը մինիմալ լինի և իրենց հասցնեն այն, ինչ իրենց անհրաժեշտ է»:

Առավել մանրամասն՝ թերթի այսօրվա համարում: