Հույս ունենք՝ Թրամփը, հետևելով Կոնգրեսին, կճանաչի ցեղասպանությունը. Շիֆը՝ Ամերիկայի ձայնին

ԵՐԵՎԱՆ, ԱՊՐԻԼԻ 23, 24News

«Անցած ամիսների ընթացքում մենք լուրջ առաջընթաց ենք գրանցել. Հայոց ցեղասպանությունը ճանաչվել է Կոնգրեսում երկու կուսակցությունների կողմից, եւ մենք հույս ունենք, որ նախագահը եւս կճանաչի Ցեղասպանությունը՝ հաշվի առնելով նման լուրջ աջակցությունը Կոնգրեսում»,-այդ մասին «Ամերիկայի ձայնին» տված բացառիկ հարցազրույցի ժամանակ նշել է ԱՄՆ Կոնգրեսական, Հայոց ցեղասպանության ճանաչման Կոնգրեսի բանաձևի համահեղինակ Ադամ Շիֆը՝ հավելելով, որ դա կարևոր քայլ է, եթե ուզում ենք առաջնորդ լինել բարոյականության ոլորտում:

Հարցին՝ ի՞նչ փոփոխություններ կարելի է ակնկալել ԱՄՆ քաղաքականության մեջ Կոնգրեսի ճանաչումից հետո, նա պատասխանել է. «Քանի որ այդպիսի լուրջ առաջընթաց գրանցեցինք, ես հույս ունեմ, որ Կոնգրեսը յուրաքանչյուր նստաշրջանում կճանաչի Ցեղասպանությունը եւ մենք կանցնենք արդեն փոխհատուցման հետ կապված, արդարադատության հետ կապված հարցերին:

Ես այս տարի կոչ կանեի ԱՄՆ նախագահին օրինակ վերցնել Կոնգրեսի թե դեմոկրատ, թե հանրապետական ներկայացուցիչներից եւ ճանաչել Հայոց ցեղասպանության փաստը՝ չհետեւելով Թուրքիայի պահանջներին: Իհարկե, մտահոգություններ կան, որ նախագահի սերտ հարաբերությունները Թուրքիայի նախագահ Էրդողանի հետ կամ նրա բիզնես շահերը Թուրքիայում կարող են նրան ստիպել չճանաչել Հայոց ցեղասպանությունը: Դա բոլորովին էլ լավ ծառայություն չի լինի Ամերիկային»:

Ադամ Շիֆը փայլուն է գնահատել 1,5 մլն բաժին սնունդ բաժանելու նախաձեռնությունը՝ ի հիշատակ Ցեղասպանության զոհերի, քանի որ համայնքում կան բազմաթիվ տարեց մարդիկ, որոնք չեն կարող ինքնուրույն գնալ խանութ եւ սնունդ գնել. «Նման նախաձեռնությունները ցույց են տալիս մեր համայնքի լավագույն կողմերը, երբ մարդիկ ծանր վիճակում միավորվում են իրար օգնելու համար»:

ԱՄՆ կոնգրեսականն անդրադարձել է նաև ԱՄՆ կողմից Հայաստանին տրամադրվող օգնությանը. «Գիտեմ, որ ԱՄՆ միջազգային զարգացման գործակալությունը շուրջ 1,1 մլն դոլարի օգնություն է հատկացնելու Հայաստանին կորոնավիրուսի դեմ պայքարի շրջանակներում, սակայն մենք աշխատում ենք Կոնգրեսում եւ արդեն իսկ դրական տեղեկատվություն ենք ստացել պետքարտուղարությունից, որ Հայաստանին կարող են հատկացվել նաեւ այլ միջոցներ՝ ժողովրդավարության եւ տնտնեսության զարգացման համար:

Այսօր թե՛ Հայաստանում, թե՛ ԱՄՆ-ում առաջնահերթ հարցը կորոնավիրուսի վարակի տարածումը կանխելն է, քանի որ մինչև մարդիկ իրենց անվտանգ չզգան, չեն դուրս գա աշխատանքի, և տնտեսությունը տուժելու է: Ուստի գլխավոր նպատակը Հայաստանում և Արցախում կորոնավիրուսի վարակի տարածման կանխումն է»:

 

Տեսանյութեր

Live

Լրահոս