ԵՐԵՎԱՆ, ԱՊՐԻԼԻ 23, 24News
ՀՀ երկրորդ նախագահ Ռոբերտ Քոչարյանի պաշտպան Հովհաննես Խուդոյանը նոր միջնորդություն է ներկայացրել Երևան քաղաքի ընդհանուր իրավասության դատարան՝ խնդրելով վերացնել Ռոբերտ Քոչարյանի նկատմամբ ընտրված խափանման միջոց կալանավորումը։ Այդ մասին հայտարարություն է տարածել ՀՀ երկրորդ նախագահի պաշտպանական թիմը:
Նոր միջնորդության համար հիմք է եղել երկրում առկա կորոնավիրուսային հիվանդության համաճարակը, և Քոչարյանի վարակման վտանգը՝ հաշվի առնելով, որ նա գտնվում է տարիքային ռիսկային խմբում:
Պաշտպանը նաև դիմել է Երևանի ընդհանուր իրավասության դատարանի նախագահին՝ ներկայացված միջնորդությունն այլ դատավորի վերամակագրելու համար:
Նշենք, որ սահմանադրական կարգի ենթադրյալ տապալման գործով հերթական դատական նիստը տեղի կունենա մայիսի 8-ին։ Քրեական գործը քննող դատավոր Աննա Դանիբեկյանը, ով մարտի 13-ից գտնվում էր արձակուրդում, ապրիլի 17-ին դուրս է եկել աշխատանքի և կրկին՝ ապրիլի 20-ից մինչև մայիսի 7-ը արձակուրդ է ձևակերպել։
Նշենք, որ 1 ամսից ավելի է, որ Քոչարյանի և մյուսների գործով դատական նիստը չի կայանում, քանի որ դատավոր Աննա Դանիբեկյանը վիրահատության է ենթարկվել:
Դատավորն ապրիլի 16-ին ներկայացրել է աշխատանքի, բայց ժամեր անց կրկին արձակուրդ է վերցրել մինչև մայիսի 7-ը։ Հաջորդ դատական նիստը նշանակվել է մայիսի 8-ին։