ԵՐԵՎԱՆ, ՄԱՅԻՍԻ 1, 24News
ԱԺ նախկին պատգամավոր Մանվել Գրիգորյանի պաշտպանները բողոքարկել են Գրիգորյանի առանձնատանը հայտնաբերված «ՈՒԱԶ» մակնիշի տասը մեքենաները «Երկրապահ կամավորականների միություն» հասարակական կազմակերպության օգտագործմանը հանձնելու դատարանի որոշումը: Այս մասին տեղեկանում ենք դատական տեղեկատվական համակարգից:
Դատարանի այս որոշման դեմ Մանվել Գրիգորյանի պաշտպաններից Լևոն Բաղդասարյանն ապրիլի 14-ին բողոք է ներկայացրել, որը մակագրվել է դատավոր Մխիթար Պապոյանին:
Դատարանը համարել է, որ բողոքարկված դատական ակտը արձանագրային որոշում է, որը, Քրեական դատավարության կարգավորումների համաձայն, բողոքարկման ենթակա չէ, արդյունքում որոշվել է պաշտպանի վերաքննիչ բողոքը թողնել առանց քննության:
Ավելի վաղ՝ ապրիլի 7-ի դատական նիստում, Երևանի ընդհանուր իրավասության դատարանի դատավոր Մնացական Մարտիրոսյանը որոշել էր Մանվել Գրիգորյանի առանձնատանը հայտնաբերված մթերքներ, մի շարք կենցաղային իրեր հանձնել ԵԿՄ-ի օգտագործմանը և տնօրինմանը, իսկ «ՈՒԱԶ» մակնիշի տասը մեքենաները հանձնել ԵԿՄ-ի օգտագործմանը՝ առանց տնօրինման իրավունքի:
Ավելի վաղ, 24News-ի հետ զրույցում Գրիգորյանի պաշտպան Գուրգեն Գրիգորյանն անօրինական էր համարել դատարանի որոշումը՝ նշելով. «Դատարանը ինչպես միշտ իր բարձունքում էր: Այս որոշումը միանշանակ անօրինական էր»:
Հիշեցնենք, որ Մանվել Գրիգորյանը մեղադրվում է ՀՀ քրեական օրենսգրքի մի քանի հոդվածներով. մի խումբ անձանց կողմից նախնական համաձայնությամբ ապօրինի զենք-զինամթերք ձեռք բերելու, իրացնելու, պահելու, փոխադրելու կամ կրելու, առանձնապես խոշոր չափերով յուրացման կամ վատնման, ինչպես նաեւ հարկը կամ տուրքը չվճարելու, առանձնապես խոշոր չափերով շորթման, դրանք կազմակերպելու կամ կազմակերպմանն օժանդակելու համար:
Նրա գործով հաջորդ դատական նիստը նշանակված է մայիսի 26-ին: