ԵՐԵՎԱՆ, ՄԱՅԻՍԻ 8, 24News
Արցախի նորընտիր նախագահ Արայիկ Հարությունյանը ֆեյսբուքյան էջում գրառում է արել՝ հորդորելով չթերագնահատեք համավարակի վտանգավորության աստիճանը:
«Հարգելի՛ հայրենակիցներ, երեկ մեր հանրապետությունում նոր տիպի կորոնավիրուսով վարակման, ցավոք, հերթական երկու դեպքերն են արձանագրվել: Դրանք ահազանգում են այն մասին, որ, չնայած առողջապահության նախարարության հորդորներին, ինքներս մեր հանդեպ շարունակում ենք անփույթ և անպատասխանատու պահվածք դրսևորել:
Հանրային վայրերում այս օրերին յուրաքանչյուր քայլափոխի կարելի է հանդիպել մարդկանց ստվար խմբերի, որոնք համավարակից պաշտպանվելու գրեթե ոչ մի միջոց չեն կիրառում:
Սիրելի՛ համերկրացիներ, նման պահվածքն ուղղակի անթույլատրելի է: Հորդորս որպես կո՛չ ընդունեք. հանուն ձեր եւ ձեր հարազատների առողջության պահպանման՝ խստորեն հետևե՛ք սահմանված կանոններին, մի՛ թերագնահատեք համավարակի վտանգավորության աստիճանը:
Սա մեր պետության առջեւ ծառացած ներքին ամենամեծ մարտահրավերներից է, որի դեմ պետք է լրջորեն պայքարել: Այդ պայքարի առաջամարտիկը մեզանից յուրաքանչյուրն է, և իմ խնդրանքն է, որպեսզի ամեն մեկը սթափ գնահատի իրավիճակը ու ամենայն պատասխանատվությամբ կատարի իր բաժին պարտականությունը՝ նախ սեփական անձի, ապա՝ պետության նկատմամբ:
Ի դեպ, որտե՞ղ են նախագահի այն թեկնածուներն ու քաղաքական ուժերը, նրանց սատարող հասարակական կազմակերպությունների ներկայացուցիչներն ու լրատվամիջոցները, որոնք, համավարակի տարածմամբ «մտահոգված», կոչ էին անում մեր հանրապետությունում հետաձգել համապետական ընտրությունները: Արդյո՞ք վտանգը միայն ընտրություններով էր պայմանավորված, որ միանգամից դադարեցվել են այդ առթիվ հնչեցվող բոցաշունչ ճառերն ու ելույթները…
Համավարակը քաղաքական չէ, և կարծում եմ՝ համամիտ կլինեք, որ այն շահարկման թեմա դարձնելը, պատվաբեր չէր: Իսկ դրա դեմ զօր ու գիշեր պայքարող մեր բուժաշխատողներին մեկ անգամ ևս հայտնում եմ իմ երախտագիտությունը»: