ԵՐԵՎԱՆ, ՄԱՅԻՍԻ 6, 24News
Պաղեստինյան ՀԱՄԱՍ արմատական շարժման պաշտոնյա Իզզաթ ալ Ռաշիքը հայտարարել է, որ Ռաֆահ քաղաքում Իսրայելի ռազմական գործողությունը վտանգի տակ կդնի հրադադարի շուրջ բանակցությունները։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Կատարը և Եգիպտոսը փորձում են հասնել Իսրայելի և ՀԱՄԱՍ-ի միջև հրադադարի, սակայն համաձայնության հասնելու հույսերը նվազել են այն բանից հետո, երբ ՀԱՄԱՍ-ը մայիսի 5-ին կրկնեց իր պահանջը՝ պատանդների ազատման դիմաց վերջ դնել պատերազմին, իսկ Իսրայելի վարչապետ Բենիամին Նեթանյահուն բացառեց նման հնարավորությունը, հավելում է Reuters-ը։
Միևնույն ժամանակ Ռաֆահում գտնվող պաղեստինցիները սկսել են տարհանվել, մի մասը՝ մեքենաներով, մյուսները՝ սայլերով, ոմանք էլ՝ ոտքով։ Նրանցից շատերն արդեն իսկ առնվազն մեկ անգամ տեղահանվել էին 7 ամիս տևող հակամարտության ընթացքում։
Ինչպես ավելի վաղ հայտնել էր «Արմենպրես»-ը, Իսրայելի բանակը Գազայի հատվածի Ռաֆահ քաղաքի արևելքում գտնվող պաղեստինցիներին տարհանվելու հրահանգ է տվել՝ հայտնելով, որ շուտով ռազմական գործողություն է սկսելու «տարածքում գործող ահաբեկչական կազմակերպությունների դեմ»։
Իսրայելի և ՀԱՄԱՍ-ի միջև պատերազմը սկսվել է հոկտեմբերի 7-ին ՀԱՄԱՍ-ի զինյալների հարձակումից հետո, որի հետևանքով Իսրայելում 1200 մարդ էր զոհվել, շուրջ 250 մարդ՝ գերեվարվել։ Իսրայելի ռազմական գործողությունների ընթացքում Գազայի հատվածում, ըստ տեղի իշխանությունների, զոհվել է ավելի քան 34 600 մարդ, վիրավորների թիվը գերազանցել է 77 000-ը։
--00—ԼՀ