ԵՐԵՎԱՆ, ՍԵՊՏԵՄԲԵՐԻ 12, 24News
Բրիտանա-շվեդական AstraZeneca ընկերության կողմից կորոնավիրուսի պատվաստանյութի փորձարկման դադարեցումը պատվաստվածներից մեկի մոտ բացասական արձագանքից հետո «արթնազանգ» էր, բայց դա չպետք է հուսահատեցնի հետազոտողներին, ասել է Առողջապահության համաշխարհային կազմակերպության (ԱՀԿ) գլխավոր գիտնականը: Այս մասին գրել է Ամերիկայի ձայնը։
«Սա արթնացման կոչ է՝ հասկանալու, որ կլինիկական զարգացման մեջ կան վերելքներ և վայրէջքներ, և մենք պետք է պատրաստ լինենք դրանց: Մենք չպետք է հուսահատվենք: Նման բաներ լինում են», - ասել է Սումյա Սվամինաթանը:
Աշխարհում արդեն 900.000 մարդու կյանք խլած վիրուսին վերջ տալու համար մշակվող պատվաստանյութերից ամենահեռանկարայինը, ըստ ԱՀԿ-ի, AstraZeneca-ի տարբերակն էր, որը մշակվում էր Օքսֆորդի համալսարանի հետ ԱՄՆ-ում և Մեծ Բրիտանիայում:
Ընկերության գործադիր տնօրեն Պասկալ Սորիոտի փոխանցմամբ՝ մինչև տարվա վերջ պարզ կլինի՝ արդյոք AstraZeneca-ի փորձնական պատվաստանյութը կորոնավիրուսից կպաշտպանի մարդկանց: Իսկ փորձարկումները տեղի կունենան, եթե բրիտանական դեղագործին թույլատրվի վերսկսել գործընթացը:
Հաղորդվում է, որ պատվաստանյութից վատացած մասնակիցը տառապում էր նյարդային ախտանիշներով, որոնք կապված էին ողնաշարի հազվագյուտ բորբոքային խանգարման հետ:
AstraZeneca-ի գործադիր տնօրենը նշել է, որ փորձարկումների ընթացքում իրենք տեղյակ չեն եղել կամավորի ախտորոշման մասին:
«Մենք պետք է համբերատար լինենք և ճիշտ գործենք: Տվյալ անձի առողջական վիճակի շուրջ լիարժեք աշխատանք է տարվում, որից հետո բժիշկներն ու փորձագետները վերլուծություն կանեն և կուղարկեն Անվտանգության Կոմիտե: Այնտեղից մեզ կասեն՝ վերսկսել փորձարկումները, թե ոչ: Որոշումը նրանց ձեռքում է, և մենք այժմ ոչինչ չենք կարող անել ավելին իմանալու համար»,-ասել է նա:
ԱՄՆ-ի Ալերգիայի և վարակիչ հիվանդությունների ազգային ինստիտուտի տնօրեն դոկտոր Էնթոնի Ֆաուսիի խոսքով՝ արտասովոր ոչինչ չկա, որ AstraZeneca-ն դադարեցրել է պատվաստանյութի փորձարկումը անվտանգության վերանայման համար, բայց ցավալի է մասնակիցներից մեկի առողջական «լուրջ անբարենպաստ» վիճակը:
«AstraZeneca ընկերության փորձարկվող պատվաստանյութը լուրջ անբարենպաստ ազդեցություն է ունեցել, ինչը նշանակում է, որ կասեցվել է մնացած կամավորների գրանցումը մինչև հստակ կպարզվի, թե ինչ է տեղի ունեցել»,-ասել է Ֆաուչին:
Միացյալ Նահանգները ներդրել է ավելի քան 10 միլիարդ դոլար վեց ընկերություններում, որոնք պոտենցիալ պատվաստանյութեր են մշակում: Մայիսին ԱՄՆ-ն հայտարարեց, որ AstraZeneca-ին 1,2 միլիարդ դոլար կվճարի իր հավանական պատվաստանյութի առնվազն 300 միլիոն չափաբաժնի համար:
-- 00—ՄՀ