ԵՐԵՎԱՆ, ԴԵԿՏԵՄԲԵՐԻ 28, 24News
Գարդման-Շիրվան-Նախիջևան համահայկական միությունը հայտարարություն է տարածել թուրք-ադրբեջանական նոր զորավարժության կապակցությամբ
«Դեկտեմբերի 26-ից 28-ն ընկած ժամանակահատվածում Ադրբեջանում տեղի է ունեցել «Սպառնալիքների արձագանքման հիբրիդային ուսուցում» թուրք-ադրբեջանական համատեղ զորավարժությունը։
Վերջին երեք տարիների ընթացքում թուրք-ադրբեջանական համատեղ զորավարժությունները որպես կանոն ուղղված են եղել Հայաստանի դեմ, ենթադրաբար այս նոր զորավարժությունը ևս բացառություն չէ։ Ադրբեջանը շարունակում է նման քայլերով զարգացնել ագրեսիվ հռետորաբանություն։ Զորավարժությունների, ռազմական բյուջեի մեծացման, ռազմական ագրեսիվ հռետորաբանության ուղեկցությամբ անհնար է իրական կառուցողականության միջավայր ձևավորել։ Սա ևս մեկ անգամ վկայում է, որ Ադրբեջանն առաջնորդվում է ճնշման ու բռնության գաղափարի տեսլականով։
Մինչդեռ ամիսներ առաջ էթնիկ զտումներ իրականացրած պետությունը այժմ պետք է մտածեր Լեռնային Ղարաբաղի հայության ոտնահարված իրավունքների շուտափույթ վերականգնման, 35 տարի առաջ պատմական Գարդմանից, Շիրվանից ու Նախիջևանից ավելի քան կես միլիոն հայության իրավունքների ճանաչման, ոչնչացված ու խեղվող հայկական մշակութային ժառանգության հաշվառման ու պահպանության մասին, ոչ թե գնար ռազմականացման ճանապարհով։
Այս ամենը բացարձակ անպատժելիության, բռնապետության վերարտադրման հնարավորությունների ու մարդու իրավունքների գերակայության գաղափարի նահանջի հետևանքն է։ Մենք բազմիցս արձանագրել ենք, որ նման գործընթացները լի են նորանոր դժբախտություններ պարունակող վտանգներով, որոնց կանխարգելման միակ իրական միջոցը մարդկանց դեմ գործած հանցանքներին տրվող համարժեք պատասխանն է։
Ուստի հերթական անգամ մեր մտահոգությունն ենք հայտնում Ադրբեջանում ագրեսիայի տարրեր պարունակող զարգացումների կապակցությամբ և կոչ անում միջազգային հանրությանը համապատասխան միջոցներ ձեռնարկել ապագայի կայունության ապահովման ուղղությամբ»,- ասված է հայտարարության մեջ։
--00--ԼՀ