ԵՐԵՎԱՆ, ԱՊՐԻԼԻ 24, 24News
Նիսի քաղաքապետի խորհրդական Պիեր Ֆիորին, անդրադառնալով Հայոց ցեղասպանությանը, կարծիք է հայտնել, որ քաղաքացիական հասարակության հիմունքները և այդ ամբողջ կոնցեպտը պետք է դպրոցներում ներառել, որ երեխաները մեծանան հենց այդ հիմունքներով, որպեսզի այսպիսի համամարդկային աղետները այլևս երբեք չկրկնվեն:
Նիսի քաղաքապետի խորհրդականը նման կարծիք հայտնեց Ծիծեռնակաբերդի հուշահամալիրում «Արմենպրես»-ին տված հարցազրույցում:
«Այսօր ես այստեղ եմ որպես Նիսի քաղաքային իշխանությունների ներկայացուցիչ՝ հիշատակելու Հայոց ցեղասպանության տարելիցը: Մենք Ֆրանսիայում շատ լավ հասկանում ենք հայերի դերը մեր երկրում: Այդ պատճառով էր, որ ընդամենը մի քանի ամիս առաջ Միսաք և Մելինե Մանուշյանները վերահուղարկավորվեցին Ֆրանսիայի պանթեոնում:
Ինչպես նաև մենք շատ ուղիղ աշխատում ենք տեղի հայկական համայնքի և ասոցիացիաների հետ, որոնց հետ արդեն երկար տարիներ իրականացնում ենք տարբեր ծրագրեր»,- ասաց Պիեր Ֆիորին
Նա նշեց, որ ծրագրերը շատ են, ու Ցեղասպանության տարելիցի կապակցությամբ Հայաստան այցը նաև լավ առիթ է դարձել հանդիպելու և իշխանության տարբեր ներկայացուցիչների հետ քննարկելու կոնկրետ ծրագրեր:
--00—ՅՄ