ԵՐԵՎԱՆ, ԴԵԿՏԵՄԲԵՐԻ 27, 24News
Երեւանի նախկին քաղաքապետ Հայկ Մարությանը Երեւանի ավագանու անդամի լիազորությունները դադարեցնելու դիմում է ներկայացրել: Տեղեկությունը «Հայկական ժամանակ»-ի հետ զրույցում հաստատեց Երեւանի ավագանու «Իմ քայլը» խմբակցության քարտուղար Լեւոն Հարությունյանը: Հարությունյանը նշեց, որ քաղաքապետը դիմում է ներկայացրել, եւ հավանաբար այն արդեն ստորագրվել է:
Հայկ Մարությանի մանդատը կփոխանցվի «Իմ քայլը» կուսակցությունների դաշինքի ընտրական ցուցակի հերթական հաջորդ համարին: Իսկ այդ ցուցակով հաջորդ համարում «Քաղաքացիական պայմանագիր» կուսակցության անդամ Նաիրի Փեթակչյանն է:
Նաիրի Փեթակչյանը «Հայկական ժամանակ»-ի հետ զրույցում ասաց, որ պատրաստվում է վերցնել մանդատը: Փեթակչյանը նաև «Քաղաքացիական պայմանագրի» Մալաթիա-Սեբաստիա տարածքային կառույցի խորհրդի անդամ է: Նա աշխատում է Մալաթիա-Սեբաստիա վարչական շրջանի առեւտրի, ծառայությունների եւ գովազդի բաժնում:
Հիշեցնենք՝ դեկտեմբերի 22-ից Հայկ Մարությանը Երեւանի քաղաքապետը չէ. «Իմ քայլը» անվստահություն հայտնեց նրան: Երեւանի նոր քաղաքապետ է ընտրվել քաղաքապետի առաջին տեղակալ Հրաչյա Սարգսյանը:
--00--ԿԿ