ԵՐԵՎԱՆ, ՓԵՏՐՎԱՐԻ 1, 24News
Փետրվարի 1-ին Հայաստանի Հանրապետության արդարադատության նախարարության քրեակատարողական ծառայության պետ, արդարադատության գնդապետ Ամբակում Գրիգորյանն ընդունել է Ռաուլ Վալենբերգ մարդու իրավունքների և մարդասիրական իրավունքի ինստիտուտի հայաստանյան գրասենյակի տնօրեն Հաննա Ջոնսոնին, արդարադատության հասանելիության թեմատիկ ոլորտի ղեկավար Ջոշ Աունստեդին և գրասենյակի այլ ներկայացուցիչների։
Հանդիպմանը ներկա են եղել նաև Ծառայության պետի առաջին տեղակալ, արդարադատության գնդապետ Սահակ Գրիգորյանը և կենտրոնական մարմնի սոցիալական, հոգեբանական և իրավական աշխատանքների բաժնի պետ Ծովինար Թադևոսյանը։
Այցի հիմնական նպատակն էր քննարկել «Սևան» քրեակատարողական հիմնարկում պահպանության և անվտանգության ծառայության կազմակերպման նոր մոդելի ներդրման պիլոտային ծրագիրը։ Ծրագրի շրջանակներում նախատեսվում է իրականացնել քրեակատարողական ծառայողների թեկնածուների խորը մասնագիտական ուսուցում։
Ամբակում Գրիգորյանը ողջունել է հյուրերին, շնորհակալություն հայտնել համագործակցության համար՝ նշելով, որ հատկապես կարևորում է Ծառայության անձնակազմի մասնագիտական կարողությունների զարգացման անհրաժեշտությունը։ Ծառայության պետն ընդգծել է, որ ծրագրի հաջող ընթացքի դեպքում այն կներդրվի ամբողջ համակարգում։
Պատվիրակության անդամներն անդրադարձել են «Սևան» քրեակատարողական հիմնարկ իրենց այցին, որտեղ պիլոտային ծրագրի շրջանակներում ծանոթացել են հիմնարկի գործունեության առանձնահատկություններին։
Հանդիպման ավարտին կողմերը պատրաստակամություն են հայտնել շարունակելու և ամրապնդելու համագործակցությունը։
--00—ԼՀ