ԵՐԵՎԱՆ, ՀՈՒԼԻՍԻ 03, 24New
ՀՀ կառավարությունն առաջարկում է հետաձգել Ազգային ժողովի «Իմ քայլը» խմբակցության պատգամավորներ Նիկոլայ Բաղդասարյանի և Նազելի Բաղդասարյանի կողմից ներկայացված «ՀՀ Քրեական դատավարության օրենսգրքում փոփոխություններ և լրացումներ կատարելու մասին» օրենքի նախագծի քննարկումը։
Ըստ Կառավարության հուլիսի 4-ի նիստում ընդգրկված հարցի՝ պատգամավորների ներկայացրած նախագիծը և առաջարկվող կարգավորումները նման են ՀՀ արդարադատության նախարարի 2019 թվականի ապրիլի 26-ի թիվ 137-Ա հրամանով ձևավորված Քրեական դատավարության օրենսգրքի նախագիծը մշակող աշխատանքային խմբի և ՀՀ արդարադատության նախարարության կողմից համատեղ մշակվող ՀՀ քրեական դատավարության օրենսգրքի նախագծում տեղ գտած կարգավորումներին, ուստի նախագծի հեղինակներին առաջարկում է հետաձգել նախագծի քննարկումը, դրանով առաջարկվող կարգավորումները Քրեական դատավարության օրենսգրքի նախագիծը մշակող աշխատանքային խմբի հետ քննարկելու և երկու նախագծերում առաջարկվող կարգավորումները նույնական ձևակերպումներով ամրագրելու նպատակով:
Նշենք, որ նախագծով, մասնավորապես, առաջարկվում է կարգավորել մեղադրյալի, ամբաստանյալի և վկայի ցուցմունքների հրապարակման հետ կապված հարաբերությունները: Հավելենք, որ հուլիսի 4-ի նիստի օրակարգում ընդգրկված այս հարցը չզեկուցվողներից է, այն գործադիրի հավանությանը կներկայացնի Արդարադատության նախարար Ռուստամ Բադասյանը։