Ո՞ւմ ականջներն են երևում ԲԲՍ-ի նյութի հետևում․ Աշոտյանը մատնանշում է գործող վարչապետին

ԵՐԵՎԱՆ ՕԳՈՍՏՈՍԻ 09, 24News   

1

Քանի օր է, ինչ հանրությունը քննարկում է ԲԲՍ ռուսական ծառայության միջոցով կազմակերպված տեղեկատվական սադրանքը։ Ֆեյսբուքյան իր էջում այս մասին գրում է ՀՀԿ փոխնախագահ Արմեն Աշոտյանը․

«Հարցերը հիմնականում հանգում են հետեւյալ շարանին։

1. Արդյո՞ք իրականությանը համապատասխանում է հոդվածում տեղ գտած տեղեկությունը։
Պատասխան՝ ՉԻ համապատասխանում։ Այն արդեն հերքվել է գեներալ Օգանովսկու կողմից։ Այն գոյություն չունի Մարտի 1-ի գործում, եւ ինչպես ինձ հետ զրույցում հաստատեց նաեւ հոդվածի հեղինակը, այն բացակայում է նաեւ Քոչարյանի գործում։

2. Ո՞ւմ ականջներն են երեւում ԲԲՍ-ի նյութի հետեւում։
Պատասխան՝ հետեւելով պատկան մարմինների դնջոտ, խուսափողական, ես կասեի նաեւ բարեհաճ արձագանքներին, ակնհայտ է, որ հոդվածն իրենց սրտով է, ավելին՝ մամուլում եղան հրապարակումներ, որ այն կազմակերպվել է ՀՔԾ ղեկավար Սասուն Խաչատրյանի կողմից տխրաինքնահռչակ Վահե Գրիգորյանի միջոցով, որի ուշացած հերքումը, մեղմ ասած, համոզիչ չէր։

3. Ո՞ւմ էր ձեռնտու այս ֆեյք-նյուսի հրապարակումը։
Պատասխան՝ Հայաստանի գործող վարչախմբին՝ Նիկոլի գլխավորությամբ։ Տեսնելով, թե ինչպիսի ջանասիրությամբ, ոգեւորությամբ, մանիպուլյատիվ շեշտադրումներով, թեմայի մեջ իբր նոր սկանդալային բացահայտումներ անելով ԲԲՍ-ի սադրանքը տարածում էին Հանրայինը, Ազատությունը, Արմենպրեսը, 1-ին.ամ-ը եւ այլ իշխանամերձ ԶԼՄ-ներ, կարող ենք արձանագրել, որ սա ոչ թե ԲԲՍ-ի նվերն էր Նիկոլին, այլ հենց այսօրվա իշխանությունների քարոզչական ագրեսիան՝ սեփական պետության եւ ժոշովրդի դեմ, իսկ ԲԲՍ-ին ծառայել է որպես «հեղինակավոր աղբյուր» ու լվացքատուն՝ իհարկե հետապնդելով նաեւ սեփական աշխարհաքաղաքական շահեր։

Ի մի բերելով այս վերլուծությունը՝ կարող ենք պնդել, որ՝

1․ Այս իշխանությունների համար չկա որեւէ բարոյական կամ ազգային տաբու։ Տանկերով ընդդիմությանը սպառնացող Փաշինյանը չի խորշում նաեւ վտանգավոր եւ կեղտոտ խաղերից՝ Արցախի եւ հայ ժողովրդի հաշվին։
2․ Մարտի մեկի գործը ոչ միայն բացահայտված չէ, այլեւ խորը փակուղում է, իսկ Քոչարյանի քաղաքականա-իրավական արդարացման գործընթացը խիստ անհագստացնում է Փաշինյանին։
3․ Հայաստանում իշխանափոխության վրա գլոբալ քաղաքական խաղեր կազմակերպողների համար պրոցեսը լիարժեք չէ առանց Արցախի։ Արցախյան պատերազմի մասնակիցները ազգային շահերի հաշվին գեոպոլիտիկ խաղեր չեն տալու, ուստի մնացել են խաղեր տվողների կոկորդին։ Այս իմաստով Նիկոլի շուրթերից լսել «Արցախը Հայաստան է» ավելի շատ նմանվում է սպառնալիքի, քան հայրենասիրության»։

Տեսանյութեր

Live

Լրահոս

Related news