ԵՐԵՎԱՆ, ԱՊՐԻԼԻ 6, 24News
Ամերիկացի միլիարդատեր Իլոն Մասքը 2,64 միլիարդ դոլար է ծախսել Twitter Inc-ի բաժնետոմսերը գնելու համար: Այդ մասին, ինչպես տեղեկացնում է «Արմենպրես»-ը, վկայում են փաստաթղթերը, որոնք ԱՄՆ-ի Արժեթղթերի եւ սակարանների հանձնաժողով (SEC) են ներկայացվել ապրիլի 5-ի երեկոյան:
Ընդ որում՝ նոր փաստաթուղթը միլիարդատերը ներկայացրել է 13D ձեւով, ինչը նշանակում է, որ ներդրողը մտադրվում է ակտիվ մասնակցություն ունենալ ընկերության աշխատանքին: Նախորդ փաստաթուղթը, որն ուղարկվել է ապրիլի 4-ին, Մասքը տվել է 13G ձեւով, որը ենթադրում է ընկերությունում պասիվ բաժնի գրանցում, ինչը նշանակում է, որ ներդրողը չի մտադրվում հսկողություն իրականացնել, նշում է CNBC-ն: Ապրիլի 5-ի տվյալներով՝ Մասքին պատկանում է Twitter-ի 73,115 միլիոն բաժնետոմս կամ 9,1 տոկոսը:
Ապրիլի 5-ին Twitter-ի բաժնետոմսերի սակարկությունների փակման պահի դրությամբ Մասքի բաժինը գնահատվում էր 3,73 միլիարդ դոլար: Մասքն սկսել է բաժնետոմսեր գնել հունվարի վերջից եւ գործարքները կատարել է գրեթե ամեն օր: Առավել խոշոր գործարքը ներդրողը կատարել է փետրվարի 7-ին. նա գնել է 176 միլիոն դոլար գումարի ավելի քան 4,8 միլիոն բաժնետոմս, հետեւում է փաստաթղթերից:
Մինչդեռ նախօրյակին հայտնի է դարձել, որ Մասքը մտնելու է Twitter-ի տնօրենների խորհրդի կազմի մեջ: Առայժմ նա խորհրդի անդամ է, ընկերությունում նրա բաժինը չի կարող գերազանցել 14,9 տոկոսը: Անցած շաբաթ Մասքն ընկերության հարթակի իր օգտահաշվում հայտարարել է, որ իրեն չի բավարարում այդ սոցցանցի մոտեցումը խոսքի ազատության նկատմամբ եւ ինքը «լրջորեն մտածում է» նոր հարթակ ստեղծելու մասին, հաղորդել է «Ինտերֆաքս»-ը:
--00—ՀԶ