ԵՐԵՎԱՆ, ՀՈՒՆՎԱՐԻ 25, 24News
Ադրբեջանագետ Տաթևիկ Հայրապետյանը գրում է․ «Ադրբեջանական տեղեկատվական դաշտում հիստերիա էի ծավալվել ԵԽԽՎ-ի որոշումից հետո։ Հիշեցնեմ, որ ԵԽԽՎ-ն երեկ քվեարկությամբ որոշեց չվավերացնել Ադրբեջանի պատվիրակության լիազորությունները: Այս որոշմամբ Ադրբեջանի պատվիրակությունն առնվազն 1 տարով հեռացվեց ԵԽԽՎ-ից։ Սրան նախորդել էին բազմաթիվ զեկույցներ, որով Ադրբեջանին կոչ էին անում հարգել իր ստանձնած պարտավորությունները։
Արցախի շրջափակումից առաջ և հետո, Ադրբեջանը որևէ կերպ թույլ չէր տալիս ԵԽԽՎ համազեկուցողների մուտքը Լեռնային Ղարաբաղ։ Իրականում Բաքվում հստակ որոշել էի, որ Արցախում էթնիկ զտում իրագործելուց առաջ պետք է կտրել Արցախի ու այնտեղ ապրող հայերի կապը արտաքին աշխարհի հետ, բլոկադան կարևոր քայլ էր այդ նպատակի իրագործման ճանապարհին։ Ավելին ասեմ, վերջին շրջանում Ալիևը իրեն ամբողջությամբ դուրս դնելով դիվանագիտական էթիկայի կանոններից անդրադարձել էր Եվրոպական խորհրդարանի աշխատանքին ու հայտարարել․ «Եվրախորհրդարանում շատ անպատասխանատու մարդկանց խումբ կա, որոնք մոլագարի պես են իրենց պահում։ Նրանց հակաադրբեջանական տրամադրություններն ու հայտարարությունները հատում են մարդկային նորմալ հոգեբանական վիճակի սահմանները»։
Հիմա Ադրբեջանում քննարկում են Եվրոպայի Խորհրդից դուրս գալու հարցը։
«Ադրբեջանը մտադիր չէ համակերպվել այս անարդար և կողմնակալ վերաբերմունքի հետ, և ներկայումս պաշտոնական Բաքուն դիտարկում է ոչ միայն ԵԽԽՎ-ից, այլև ամբողջությամբ ԵԽ-ից դուրս գալու ընթացակարգը։ Ադրբեջանը կարող է նաև հրաժարվել Մարդու իրավունքների եվրոպական դատարանի իրավասության ճանաչումից»,-նշված է հաղորդվող տեղեկատվության մեջ։
Եթե Ադրբեջանը նման քայլի գնա, ապա դա նշանակում է, որ իրենք բացահայտ կերպով իրենց դուրս են դնում միջազգային իրավունքից՝ դրանից բխող բոլոր հետևանքներով։ Ցավոք, միշտ հանգում եմ այն եզրակացության, որ եթե ՀՀ իշխանությունները Ադրբեջանի պահանջները կատարելու փոխարեն, աշխատեին՝ հանուն ՀՀ պետական շահի, ապա շատ աղետներ հնարավոր կլիներ կանխել, որովհետև միջազգային իրավունքից դուրս մնալը չի կարող հետևանքներ չունենալ․․․»։
--00—ՅՄ