Ծնողներս վերադարձան Հայաստան, երբ երկիրը կատաստրոֆիկ վիճակում էր․ Արմեն Սարգսյան

ԵՐԵՎԱՆ, ՍԵՊՏԵՄԲԵՐ 21, 24News

ՀՀ նախագահ Արմեն Սարգսյանը սեպտեմբերի 21-ին Գյումրիի Սև բերդում Հայաստանի Հանրապետության 28-ամյակին նվիրված միջոցառումների շրջանակում մեկնարկած «Մեր ժամանակի հերոսը» մրցանակաբաշխության ժամանակ պարգև է հանձնել փայտագործ  Սամվել Գասպարյանին:

Նախքան մրցանակի հանձնման արարողությունը ՀՀ նախագահը շնորհավորել է բոլորին համահայկական տոնի՝ Անկախության օրվա առթիվ:

«Ուզում եմ անկեղծորեն շնորհակալություն հայտնել վարչապետին նախ և առաջ այս հոյակապ գաղափարի, դրա իրականացման և այն փաստի համար, որ բոլորս այսօր հավաքվել ենք այստեղ՝ Գյումրիում ու պատվում ենք մեր այսօրվա հերոսներին: Նրանցից  յուրաքանչյուրն իսկապես հերոս է իր գործունեությամբ: Տարբեր մարդիկ են, բայց նրանցից յուրաքանչյուրն իր գործի վարպետ և շատ խորը անձնավորություն: Ուրախ էի տեսնել, որ մեր այսօրվա հերոսների մեջ կային նաև հայրենադարձներ»,- նշել է ՀՀ նախագահը:

Նախագահը պատմել է 8-րդ դասարանում ռուսաց լեզվի և գրականության դասի ընթացքում իրենց հանձնարարված մի առաջադրանքի մասին, որի շրջանակում պետք է գրեին շարագրություն «Մեր ժամանակների հերոսը» խորագրով: «Ես գրեցի շարադրությունը, բայց չհանձնեցի այն, որովհետև շատ անկեղծ էի գրել: Եվ հիմա ուզում եմ պատմել, թե ինչ էի գրել:

Ես գրել էի, որ իմ ժամանակների հերոսն իմ հայրն ու իմ մայրն են, և նրանց հազարավոր ընկերները ու տասնյակ հազարավոր ուրիշ հայեր, ովքեր 1946-1948 թվականներին պատերազմից հետո վերադարձան ավերված Հայաստան, որը պատերազմի ընթացքում կորցրել էր մոտ 200-300 հազար որդիներին: Եվ երկիրը կատաստրոֆիկ վիճակում էր: Նրանք վերադարձան Հայաստան՝ առանց վախենալու: Իմ հայրիկի, մայրիկի սերունդը՝ 1946-47 թթ հայրենադարձության սերունդը, եկան, բնակվեցին այստեղ՝ Գյումրիում և ստեղծեցին հսկայական արվեստ, արդյունաբերություն, մշակույթ, գիտություն: Իմ խորին շնորհակալությունն ուզում եմ հայտնել  նաև նրանց և կոչ անել մեր բոլոր հայերին՝ վերադարձեք հայրենիք: Ժամանակն է տուն գալու»,- նշել է նա:

ՀՀ նախագահը պատմել է, թե ինչպես իր հայրն ու նրա ընկերներն իրեն փոքր տարիքից՝ 5 տարեկանից սկսած տանում էին Հայաստանի տարբեր շրջաններ, մինչև Արցախ, ծանոթացնում ճարտարապետությանն ու բնությանը:

«Իրականում Գյումրի եմ եկել հենց այդ տարիքից՝ 5 տարեկանից: Առաջին անգամ Սև բերդը, Ձիթողցոնց տունը և Չերքեզի ձորն այդ ժամանակ եմ տեսել: Մտածելով այսօրվա մեր ժամանակի հերոսների մասին՝ իմ կողմից մեկ ուրիշ հերոս էլ ունեմ: Այդ հերոսը Գյումրին է և գյումրեցին, որ համբերատար 30 տարի սպասել է այս օրվան: Կորցնելով իր քաղաքի, իր բնակչության կեսը, հասկանալով, որ մեր ժողովուրդը պայքարի է դուրս եկել և իր ժամանակը չէ՝  նա  արժանապատվությամբ կրել է իր դժվարությունը: Ժամանակը եկել է, և ես կարծում եմ, պարոն վարչապետ, այսօր առաջին օրն է Գյումրու և գյումրեցու ապագայի, նոր, ազատ և ստեղծագործ կյանքի»,- ասել է Արմեն Սարգսյանը:

Նա գոհունակություն է հայտնել այն փաստի առթիվ, որ այսօրվա հերոսները մի տեղից չեն, քանի որ, ինչպես նշել է ՀՀ նախագահը, մեր հայրենիքը միայն Երևանը չէ, Գյումրին է, Գորիսը, Վանաձորից մինչև Իջևան, Արցախ և ամեն տեղ է: