ԵՐԵՎԱՆ, ԱՊՐԻԼԻ 24, 24News
Իտալիայի Պետական կառավարման նախարար Ռենատո Բրունետան միանում է հայ ժողովրդին՝ ոգեկոչելու Մեծ Եղեռնի հիշատակը: «Արմենպրես»-ի հաղորդմամբ՝ Բորունետան, Հայոց Ցեղասպանության 106-րդ տարելիցի կապակցությամբ արված իր հայտարարությամբ, մասնավորապես նշել է.
«Որպես վենետիկցի, որպես իտալացի, որպես մարդ, ես այսօր միանում եմ հայ ժողովրդին, ով այսօր ոգեկոչում է Մեծ Եղեռնի հիշատակը: 1915 թ.-ի ապրիլի 24-ին սկիզբ առավ Հայոց ցեղասպանությունը. արևմտյան երկրների անտարբերության ներքո Օսմանյան կայսրությունը կանխամտածված կերպով և դաժանորեն ոչնչացրեց իր 1,5 միլիոն հայ քաղաքացիներին՝ ոգեշնչելով նաև Հիտլերին վերջնականորեն լուծելու հրեաների հարցերը: Իտալահայերի ակտիվ համայնքն արտակարգ հարստություն է մեր երկրի համար, որն իրավունք չունի անտեսելու այս ժողովրդի` մինչ այժմ ծորացող վերքը»:
Լինելով ծնունդով Վենետիկից՝ այն քաղաքից, որի համար ոչ պակաս հպարտության առարկա է Իտալիայի ամենահին և մշակութային հայկական բնակավայրը լինելու հանգամանքը՝ Բրունետան իր երախտագիտությունն ու սերն է հայտնել հայ ժողովրդին այս սգո օրվա կապակցությամբ՝ նշելով հայ ժողովրդի կենսական մեծ ուժի մասին:
--00--ԱՀ