Պարեկը կրակել է Ֆորդի անվադողին, վերջինս շրջվել է․ գողություն է կանխվել, 8 անձ ձերբակալվել է

ԵՐԵՎԱՆ, ՄԱՅԻՍԻ 24, 24News

Ոստիկանության Նոր Նորքի բաժնի քրեական հետախուզության բաժանմունքում օպերատիվ տվյալներ էին ստացվել, որ փակ բաժնետիրական մի ընկերության Բագրևանդի փողոցի պահեստից մի խումբ անձինք պարբերաբար գողություն են անում։ Ըստ տեղեկությունների՝ նրանք նույն պահեստից պատրաստվում էին գողություն անել նաև մայիսի լույս 24-ի գիշերը, իսկ գողոնը տեղափոխելու էին «Ֆորդ» մակնիշի ավտոմեքենաներով։ Օպերատիվ խմբերը շտապել էին Բագրևանդի փողոց և կազմակերպել դարանակալում։ Տեղեկությունները հավաստի էին. գողության մեջ կասկածվող անձանցից մի քանիսը «Ֆորդ» մակնիշի մեքենայով հայտնվում են ոստիկանների տեսադաշտում, ապա դիմում փախուստի՝ մեքենան վարելով ոստիկանության ծառայողների ուղղությամբ։ Սկսվում է հետապնդում, որին միանում են պարեկային ծառայության Երևանի գնդի ոստիկանները։ «Ֆորդն» ընթանում է Դավիթ Բեկի փողոցի ուղղությամբ՝ չենթարկվելով ոստիկանության ծառայողների օրինական պահանջներին։ Դավիթ Բեկի փողոցում հետապնդող պարեկներից մեկը, փախուստը կանխելու նպատակով, նախազգուշական կրակոց է արձակում, ապա թիրախավորում մեքենայի անվադողն ու կրակում։ «Ֆորդը» կողաշրջվում է։ Վարորդն ու մի խումբ անձինք բերման են ենթարկվում ոստիկանության Նոր Նորքի բաժին։

Մինչ Դավիթ Բեկի փողոցում ծավալվում էին այս գործողությունները՝ Բագրևանդի փողոցում ոստիկանների տեսադաշտում է հայտնվում մյուս «Ֆորդը», որը ևս հարկադիր կանգնեցվում է՝ շնորհիվ Նոր Նորքի քրեական հետախույզներից մեկի նախազգուշական կրակոցների։ Արդյունքում՝ վարորդը և ուղևորը, մեքենայով հանդերձ, բերման են ենթարկվում բաժին։ Նոր Նորքի քրեական հետախույզները ևս երկու անձի հայտնաբերում են պահեստի մոտակայքում ու բերման ենթարկում բաժին։

Գողոնը հայտնաբերվել է։

Դեպքի առթիվ հարուցվել է քրեական գործ։ Ութ անձ ձերբակալվել են։ Հանգամանքները նախաքննությամբ պարզվում են։

--00—ԼՄ