ԵՐԵՎԱՆ, ԴԵԿՏԵՄԲԵՐԻ 5, 24News
Ռուս սենատորները պարբերաբար շփվում են հայ գործընկերների հետ թե՛ ուղիղ, թե՛ տեսակապով, թե՛ դեսպանատան միջոցով, հարաբերությունների սառեցման մասին խոսք չկա։ Այս մասին հայտարարել է Ռուսաստանի Դաշնային խորհրդի միջազգային հարցերով հանձնաժողովի ղեկավար Գրիգորի Կարասինը, փոխանցում է «ՌԻԱ Նովոստի»-ին։
Ավելի վաղ ՀՀ ԱԺ-ն հայտնել էր, որ չի մասնակցի դեկտեմբերի 19-ին Մոսկվայում կայանալիք ՀԱՊԿ Խորհրդարանական վեհաժողովի նիստին։ Միևնույն ժամանակ, նախապես նշվել էր, որ Երևանի հարաբերությունները ՀԱՊԿ-ի հետ սառեցված չեն և չկա որոշում ՀԱՊԿ-ից դուրս գալու վերաբերյալ։
Ճշտող հարցին՝ արդյո՞ք կան խոսակցություններ խորհրդարանականների միջև հարաբերությունների հնարավոր սառեցման մասին, ռուս սենատորը պատասխանել է․ «Մենք այդ մասին չենք խոսում և չենք մտածում։ Մենք մտածում ենք այն մասին, որպեսզի մեր հարաբերությունները լինեն հագեցած իրական բովանդակությամբ և լինեն ակտիվ»։
Միաժամանակ Կարասինն ընդգծել է, որ Հայաստանի պատվիրակության՝ ՀԱՊԿ ԽՎ չգալու որոշումներն ընկալվում են «ափսոսանքի զգացումով»։ Միաժամանակ հաշվի է առնվում նաև Երևանի դիրքորոշումը, որ երկիրը մնում է ՀԱՊԿ անդամ, հավելել է նա․ «Բայց նման որոշումը (ՀԱՊԿ ԽՎ չգալ-խմբ.) բնականաբար ցավալի է, մենք կցանկանայինք, որ նրանք մասնակցեին»,- եզրափակել է ռուս օրենսդիրը։
--00—ՅՄ