ԵՐԵՎԱՆ, ՀՈԿՏԵՄԲԵՐԻ 1, 24News
ԱԺ-ն 88 կողմ, 18 դեմ ձայներով ընդունեց մարզպետների լիազորությունների հստակեցման, նրանց նշանակման և ազատման կարգի սահմանման մասին օրենքը։ Դեմ քվեարկած պատգամավորները «Լուսավոր Հայաստան» խմբակցությունից են։
Նախագծի համաձայն՝ մարզպետների վրա տարածվելու են նույն չափանիշները, ինչ կառավարության անդամի վրա՝ նշանակումից առաջ վերջին 4 տարում միայն ՀՀ քաղաքացի լինելը, վերջին 4 տարում Հայաստանում բնակվելը։ Նշանակվելուց առաջ մարզպետի թեկնածուները պետք է փաստաթղթեր ներկայացնեն, որ տիրապետում են հայերենին։ Այս փաստաթուղթը պետք է կցվի համապատասխանությունը մյուս չափանիշներին հաստատող փաստաթղթային փաթեթին։
Նախագծով կհստակեցվի նաև մարզպետների ազատման կարգը։
Մարզպետն ազատվում է զբաղեցրած պաշտոնից, եթե
- հրաժարական է ներկայացրել,
- դադարեցվել է նրա ՀՀ քաղաքացիությունը, կամ նա ձեռք է բերել այլ պետության քաղաքացիություն,
- խախտվել են պաշտոնի անհամատեղելիության պահանջները,
- նշանակումից հետո ձեռք է բերել Կառավարության անդամի պաշտոնում նշանակմանը խոչընդոտող՝ կառավարության սահմանած ցանկում ընդգրկված հիվանդություն,
- Կառավարությունն ընդունել է վարչապետի՝ մարզպետին պաշտոնից ազատելու վերաբերյալ առաջարկությունը:
Մարզպետի պաշտոնը թափուր է համարվում այն դեպքերում, երբ
- մարզպետը մահացել է,
- մարզպետի նկատմամբ կայացված մեղադրական դատավճիռը մտել է օրինական ուժի մեջ,
- մարզպետին անգործունակ, սահմանափակ գործունակ կամ անհայտ բացակայող ճանաչելու մասին դատարանի վճիռը մտել է օրինական ուժի մեջ: