ԵՐԵՎԱՆ, ԴԵԿՏԵՄԲԵՐԻ 8, 24News
Ոստիկանությունը հայտարարություն է տարածել՝ կոչ անելով պահպանել օրինահարգության և համակեցության կանոնները:
«Ոչ ոք չի կարող սահմանափակել կարծիքի արտահայտման ազատությունը, բայց հիշեք, որ բոլո՛ր քաղաքացիներն ունեն կարծիքի ազատ արտահայտման, ազատ տեղաշարժվելու, անդորրի և այլ սուբյեկտիվ իրավունքներ: Հորդորում ենք ձեր սուբյեկտիվ հիմնական իրավունքներն իրականացնել բացառապես օրենքի շրջանակներում, չչարաշահել դրանք, հարգել համաքաղաքացիների իրավունքները:
Հիշեք, որ ձեր իրավունքներն օրենքին հակառակ եւ չարաշահումով իրականացնելը, ինչը դրսեւորվում է փողոցների շրջափակումով, տրանսպորտի երթեւեկության կազմալուծմամբ, առաջացնում է վարչական պատասխանատվություն: Չխանգարենք ոչ մեկին, չխանգարենք հանրային համաձայնության կայացմանը:
Հարգենք բոլորին և հարգենք ինքներս մեզ, թույլ չտանք հակահասարակական արարքներ, որոնք կարող են անվստահություն սերմանել օրենքի և օրինականության հանդեպ:
Ոստիկանությունը հավատարիմ է իր գործառույթների իրականացմանը՝ ապահովելու օրենքի առաջ բոլորի հավասարության սկզբունքը, բոլոր քաղաքացիների իրավունքների պաշտպանությունը, անդորրն ու անվտանգությունը: Համոզված ենք, որ սա նաև հասարակության առաքելությունն է և համագործակցության ենք կոչում քաղաքացիներին՝ ի շահ մեր երկրի և ժողովրդի բարօրության»,-նշված է հայտարարությունում։
Նշենք, որ ընդդիմադիր քաղաքական ուժերը ՀՀ վարչապետ Նիկոլ Փաշինյանի և նրա թիմին մինչև դեկտեմբերի 8-ը՝ ժամը 12։00-ն, ժամանակ են տվել հրաժարական ներկայացնելու համար, հակառակ պարագայում քաղաքական ուժերի ներկայացուցիչները խոստացել են անհնազանդության ակցիաներ անել:
--00—ԼՄ