ԵՐԵՎԱՆ, ՓԵՏՐՎԱՐԻ 12, 24News
Այսօր` փետրվարի 12-ին, Հայ Առաքելական Սուրբ Եկեղեցին տոնում է Սուրբ Սարգիս զորավարի, նրա Մարտիրոս որդու և 14 զինակիցների տոնը: Տոնի առթիվ այսօր առավոտյան՝ մինչև Սուրբ և Անմահ Պատարագի սկսվելը,
Ն.Ս.Օ.Տ.Տ. Գարեգին Երկրորդ Ամենայն Հայոց Հայրապետի օրհնությամբ առաջնորդանիստ Սուրբ Սարգիս եկեղեցի բերվեց Սուրբ Սարգսի աջը:
Երևանի Մեսրոպ Մաշտոցի անվան հին ձեռագրերի գիտահետազոտական ինստիտուտ Մատենադարանից առաջնորդանիստ Սուրբ Սարգիս եկեղեցի բերվեց նաև 17-րդ դարում Սուրբ Սարգիս եկեղեցում ընդօրինակված Ավետարանը:
Ս. Պատարագի ողջ ընթացքում Սուրբ Ավետարանը և Սուրբ Սարգսի աջը կմնան Սուրբ Խորանի վրա: Հավարտ Սուրբ և Անմահ Պատարագի՝ Գերաշնորհ Տեր Սիոն արքեպիսկոպոս Ադամյանը սուրբ մասունքով կօրհնի հավատավոր ժողովրդին ու զինվորներին:
Ավետարանը եկեղեցում կմնա մինչև երեկոյան ժամերգությունը:
Արարատյան Հայրապետական թեմի տեղեկատվական բաժին
--00--ԱՀ