ԵՐԵՎԱՆ, ՀՈՒԼԻՍԻ 23, 24News
Վայոց Ձորի մարզի մի քանի բնակիչներ այսօր հրավիրված մամուլի ասուլիսին խոսեցին մարզում շարունակվող ապօրինությունների, մարզպետի անգործության և ՀՀԿ-ի հետ նրա սերտաճելու մասին։
«Եթե հեղափոխությունից հետո որևէ բան չի փոխվում, ապա հեղափոխությունը կիմաստազրկվի: Խնդիրը նրանում է, որ ժողովուրդն ունի դժգոհություններ, լուծումներ չի ստանում, այստեղ մարդկանց խնդիրը համակարգային է»,-ասաց իրավապաշտպան Արտակ Գալստյանը՝ վստահեցնելով, որ իրենք ոչ մեկի պատվերը չեն կատարում, այլ միայն ժողովրդի:
Վայոց Ձորի գործարար-ֆերմեր Տիգրան Եղոյանն իր հերթին նշեց․ «Ամենամեծ քրեաօլիգարխիան գտնվում է Վայոց Ձորում, ամենամեծ վարկառուները մեր մարզի բնակիչերն են, և վերջապես մարդիկ բարձրացրին այդ խնդիրները: Մինչև մարզպետ Տրդատ Սարգսյանի՝ մարզում հայտնվելը մարզի բնակիչները նախկին իշխանության ժամանակ արդեն ցույց են տվել իրենց հեղափոխական լինելը»,-ասաց նա և նկատեց, որ
ներկայիս մարզպետն այսօր տեղում չէ, կոռուպցիոն սխեման ավելի մեծ թափով է գործում, կասկածելի կադրային քաղաքականություն է վարում․
«Բնակիչը զրկված է ջրից, եթե նախկինում խոսում էինք քաղաքական թալանչիներից, որոնք գյուղացի բնակիչներից ջուրն են գողանում և ուղարկում թշնամի պետություն, հիմա նույն մարդիկ նույն կերպ գողանում են: Հեղափոխությունից հետո որևէ բան չի փոխվել և դրա պատճառը մարզպետի անգործությունն է: Ամենայն պատասխանատվությամբ հայտարարում եմ, որ Վայոց Ձորը չունի մարզպետ»,-ասաց նա՝ նկատելով, որ հեղափոխությունը «շնչահեղձ» են արել մարզում:
Արենի խոշորացված համայնքի անդամ Անուշավան Ավետիսյանն էլ նշեց, որ ավագանին թե՛ նախկին, թե՛ ներկայիս իշխանությունների օրոք դիտվում է որպես ընդդիմություն մարզային իշխանություններին: «Եթե որևէ հարց ես բարձրացնում պիտակավորում են գործ տվողի անվան տակ: Մեր բարձրացրած խնդիրներով քրեական գործերը մեժվում են»,- ասաց նա՝
վստահեցնելով, որ ինֆորմացիա ունի, որը կտրամադրի միայն ոստիկանապետ Վալերիյ Օսիպյանին և վարչապետ Նիկոլ Փաշինյանին, քանի որ մյուսներին չի վստահում և մտահոգված է, որ փաստաթղթերը կարող են ոչնչացվել: Նրա գնահատմամբ՝ ժողովուրդն օրեցօր հիասթափություն է ապրում հեղափոխությունից:
Արենի համայնքի ավագանու անդամ Սաշիկ Կարապետյանի կարծիքով՝ Տրդատ Սարգսյանը, որը խորհրդարանական ընտրություններին հավաքել է 10 000 ձայն, այսօր հինգ հարյուր ձայն չի կարող հավաքել․ «Նա այդ ձայները վարչապետի հեղափոխության շնորհիվ ստացավ, ով էլ լիներ նրա փոխարեն կհավաքեր այդ ձայները»,-ասաց նա և նշեց, որ մարզում արտերը վառվում–թափվում են, իսկ մարզպետը չի մտածում այդ մասին:
Մարզի բնակիչ Աստղիկ Մարգարյանը վարչապետին կոչ արեց հետևողական լինել, մարզում նոր վարչության պետեր նշանակել: «Այլապես հնարավոր չէ այնտեղ ապրել»,- նկատեց նա: