ԵՐԵՎԱՆ, ՆՈՅԵՄԲԵՐԻ 30, 24News
Արցախի ժողովրդավարական կուսակցության համագումարի ժամանակ կուսակցության նախագահ Աշոտ Ղուլյանը հայտարարել է, որ Արցախի ժողովրդավարական կուսակցությունը հետևողականորեն դիրքորոշում է արտահայտել պետության արտաքին քաղաքականության հիմնական առաջնահերթությունների վերաբերյալ՝ կարևորելով Արցախի անկախության միջազգային ճանաչման և անվտանգության երաշխավորման հրամայականը: Այդ մասին հայտնում է «Արցախպրեսը»։
«Պնդել ենք ու շարունակելու ենք պնդել, որ ադրբեջանաղարաբաղյան հակամարտությունը կարող է կարգավորվել միայն ու միայն բանակցություններին Արցախի Հանրապետության լիարժեք մասնակցության պարագայում, իսկ առաջարկվող լուծման տարբերակներն ու առաջարկները առաջին հերթին պետք է ընդունելի լինեն հակամարտության անմիջական կողմի՝ Արցախի ժողովրդի համար:
Բանակցություններում սակարկման առարկա չեն կարող հանդիսանալ Արցախի անկախ կարգավիճակը և Արցախի ժողովրդի բնական իրավունքների ճանաչումն ու հարգումը»,- ասել է ԱԺԿ նախագահը, ապա համոզմունք հայտնել, որ արդարացի պահանջը հասանելի դարձնելու և այս հարցում լուրջ հաջողություններ ապահովելու համար անհրաժեշտ է օգտագործել բոլոր հնարավորությունները՝ առավելագույնս ներգրավելու հայկական Սփյուռքի և օտարերկրյա գործընկերների ներուժը:
Աշոտ Ղուլյանը նաև պատրաստակամություն է հայտնել՝ շարունակելու միջազգային գործընկերների հետ ընդգրկուն գործակցության քաղաքականությունը՝ պատրաստ լինելով անդամակցելու այնպիսի քաղաքական միավորումների, որտեղ մարդու իրավունքների պաշտպանությունն ու հարգումը, ազգերի ինքնորոշման սկզբունքն ու պետությունների ինքնիշխան հավասարությունը բարձր արժեքներն են։