Խիստ կարգապահությունը չի կարող կյանքի կոչվել, եթե ոչ իրավաչափ գործելը չպատժվի

ԵՐԵՎԱՆ, ԱՊՐԻԼԻ 8, 24News       

Անի Սամսոնյան

ՀՀ ԱԺ Մարդու իրավունքների  պաշտպանության և հանրային հարցերի մշտական հանձնաժողովի նախագահի տեղակալ
Անի Սամսոնյանն իր ֆեյսբուքյան էջում գրել է․

«ԴԻՄՈՒՄ ԵՄ ՀՀ ՈՍՏԻԿԱՆԱՊԵՏԻՆ

Հարգարժա՛ն Արման Սարգսյան,

Արտակարգ դրության իրավական ռեժիմով պայմանավորված միջոցառումների և կորոնավիրուսի դեմ պայքարի առաջնագծում բժիշկներից հետո կարևոր, պատասխանատու, ինչպես նաև խոցելի օղակը ոստիկաններն են, որոնք վերահսկում են քաղաքացիներին ներկայացված մեկուսացման և ինքնամեկուսացման պահանջները։

Ռեժիմը և վարակի կանխարգելմանն ուղղված ջանքերը ենթադրում են մարդու իրավունքների մի շարք սահմանափակումներ, որոնք արդարացված են։ Միաժամանակ Արտակարգ դրության ժամանակ սահմանափակումների ենթակա չեն մարդու մի շարք հիմնարար իրավունքներ, որոնք պիտի անվերապահորեն պաշտպանվեն․ բոլոր միջոցառումները պետք է իրականցնել՝ չխախտելով մարդու ֆիզիկական, հոգեկան անձեռնմխելիությունը, արժանապատվության իրավունքը, խոշտանգումների, դաժան, վատ վերաբերմունքի կամ բռնության չենթարկվելու իրավունքը։

Այս օրերին ականատես ենք լինում դեպքերի, երբ քաղաքացիները բարձրաձայնում են, որ ոստիկանները իրենց արժանացրել են վատ վերաբերմունքի, ընդհուպ մինչև բռնության ահազանգերով։

Քաղաքացիները վկայում են նաև, որ ոստիկանները լիակատար և հստակ չեն տիրապետում պարետատան հրահանգներին և արհեստական խոչընդոտներ են ստեղծում իրենց տեղաշարժի համար այն դեպքում, երբ դա կենսական անհրաժեշտություն է։

Կարծում եմ և՛ ոչ իրավաչափ գործողությունների և՛ հրահանգներին ոչ լիարժեք տեղեկացված գործելու պարագայում դուք աշխատանքը բարելավելու կամ վերանայելու խնդիր ունեք։

Հատկապես այն դեպքում, երբ Ոստիկանության աշխատանքը ֆորս-մաժորների, լարված իրավիճակների հանգամանքներում հայտնվում է բոլորի ուշադրության և օբյեկտիվի ներքո։

Նշեմ նաև, որ խիստ կարգապահությունը չի կարող կյանքի կոչվել, եթե ոչ իրավաչափ գործելը չպատժվի` անկախ պաշտոնից։

Միևնույն ժամանակ շնորհակալություն եմ հայտնում բոլոր այն ոստիկաններին, ովքեր այս օրերին համբերատար, պարտաճանաչ և օրինաչափ կատարում են իրենց ծառայողական պարտականությունները։

Առողջ եղեք»։

Տեսանյութեր

Live

Լրահոս