ԵՐԵՎԱՆ, ԱՊՐԻԼԻ 11, 24News
Հայ Առաքելական եկեղեցու Արցախի թեմի առաջնորդ Գերաշնորհ Տեր Վրթանես եպիսկոպոս Աբրահամյանի նախաձեռնությամբ և Արցախի Հանրապետության նախագահ Արայիկ Հարությունյանի բարձր հովանու ներքո վերստին կկազմակերպվի անվճար երթևեկություն դեպի արցախյան հինավուրց վանական համալիրներ՝ Ամարաս, Գանձասար և Հակոբավանք:
Ինչպես տեղեկացնում են Հայ Առաքելական եկեղեցու Արցախի թեմից, ուխտագնացությունները կկազմակերպվեն յուրաքանչյուր կիրակի և մեկնարկը կտրվի ապրիլի 16-ին: Մեքենաները շարժվելու են դեպի ուխտավայրեր ժամը 08։30-ին՝ Ստեփանակերտի Վերածննդի հրապարակից:
Մասնակցության համար Արցախի քաղաքացիները կարող են գրանցվել Ստեփանակերտի Ս. Հակոբ և Ս. Աստվածածին եկեղեցիներում:
«Ուխտագնացությունները դեպի մեր դարավոր ժառանգություն հանդիսացող վանքեր լավ հնարավորություն է հոգևոր արժեքների ամրապնդման և հայկական ժառանգության պահպանման համար»,- նշված է հաղորդագրությունում:
--00—ԶՀ