Էներգիայի շաբաթ՝ Երևանում․ 12-ժամյա հաքաթոնին կներկայացվեն էներգետիկ զարգացման լուծումները

ԵՐԵՎԱՆ, ՀՈԿՏԵՄԲԵՐԻ 22, 24News

նկար

Երևանի քաղաքապետարանը հրավիրում է 18-35 տարեկան նորարարներին, գործարար մտածողություն ունեցող ստեղծագործ մարդկանց, ծրագրավորման և տվյալների վերլուծության հմտություններ ունեցող երիտասարդներին, ինժեներներին, երիտասարդ գիտնականներին մասնակցելու Էներգիայի շաբաթվա շրջանակում անցկացվող «Էներջի Սիթի» հաքաթոնին: Այդ մասին հայտնում է Երևանի քաղաքապետարանը։

12-ժամյա հաքաթոնը հնարավորություն է ներկայացնելու Երևանի կայուն էներգետիկ զարգացման լուծումները։

Միջոցառման նպատակն է․

1․ քաղաքում նախապես ընտրված թիրախային համարվող ոլորտներում բարեփոխումներ իրականացնելու նպատակով օպտիմալ և նորարար լուծումների առաջարկումը,

2․ համայնքային խնդիրների լուծման գործում երիտասարդների մասնակցության ապահովումը,

3․ նոր հմտություններ ձեռք բերելու հնարավորությունը,

4․ քաղաքային միջավայրի բարելավման միջոցառումների վերաբերյալ իրազեկվածության մակարդակի բարձրացումը:

Առանձնացված թիրախային ոլորտներն են՝

քաղաքային կանաչ լուծումներ,

«կանաչ» տրանսպորտ,

էներգախնայողությունը՝ քաղաքային տնտեսությունում,

վերականգնվող էներգիայի օգտագործումը քաղաքային տնտեսությունում,

աղբի կառավարում,

ՏՏ տեխնոլոգիաները՝ որպես կանաչ տնտեսության զարգացման գործիք:

Սահմանված ժամանակահատվածում մասնակիցները պետք է մշակեն կլիմայական մարտահրավերին առնչվող լուծումներ:

Լավագույն լուծումներ առաջարկած թիմերը հնարավորություն և աջակցություն կստանան՝ զարգացնելու իրենց գաղափարներն ու դրանք կիրառելու քաղաքում:

Մրցանակներ նախատեսվում են երկու անվանակարգերում՝ «Լավագույն լուծում», «Լավագույն նորարարական» լուծում:

Հաքաթոնը տեղի կունենա Երևանի քաղաքապետարանում, ս.թ. հոկտեմբերի 27-ին՝ ժամը 10:00-ից մինչ երեկոյան 22:00-ն:

Մասնակիցները պետք է ներկայանան իրենց համակարգիչներով:

Հաքաթոնին մասնակցելու համար կարող եք գրանցվել հետևյալ հղումով` https://bit.ly/3njLYtS։

--00—ԼՄ

Տեսանյութեր