ԵՐԵՎԱՆ, ՍԵՊՏԵՄԲԵՐԻ 26, 24News
Մի խումբ գիտաշխատողներ բաց նամակ են հղել ՀՀ ԱԺ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահ Մխիթար Հայրապետյանին և ՀՀ Կրթության, գիտության, մշակույթի և սպորտի նախարար Ա. Հարությունյանին։
Նամակում ասված է․
Գիտության զարգացման հիմնադրամի բնակարաշինության ծրագրին միջամտության անհրաժեշտության մասին
Գիտության զարգացման հիմնադրամը նախաձեռնել է ք. Երևան, Պարույր Սևակի 1/7 հասցեում (ԳԱԱ Ինֆորմատիկայի և ավտոմատացման պրոբլեմների ինստիտուտի տարածքում) ՀՀ Գիտությունների ազգային ակադեմիայի աշխատակիցների համար բազմաբնակարան շենքի կառուցում: http://sdfund.sci.am/news_view.php?arch=&id=40&langid=1 Նախաձեռնությամբ հետաքրքրված, գրանցված աշխատակիցներին տրամադրվել է գործընթացի պայմանների մասին տեղեկատվություն:
Պայմաններին ծանոթանալիս՝ տպավորություն է ստեղծվում, թե նախաձեռնությունը պարզ բիզնես գործարք է, որի ողջ նպատակը, Ակադեմիայի աշխատակիցների համար շենք կառուցելու մտադրության միջոցով վերջիններիս հընթացս գործընթացից դուրս մղելով, բնակարանների վաճառք իրականացնելն է: Մտահոգությունը հիմնված է այն փաստի վրա, որ կառուցապատողը որևէ երաշխիք չի տրամադրում շենքի կառուցման, ժամկետների պահպանման, դրանց խախտման դեպքում սեփական պատասխանատվության վերաբերյալ: Ավելին, սահմանված են վճարման այնպիսի պայմաններ, որ կարող է տպավորություն ստեղծվել, թե ԳԱԱ-ում աշխատում են դրամային միլիոնատերեր. այսպես, ԳԶՀ-ի կայքում տեղադրված պայմանագրի տիպային օրինակում սահմանվում է, որ բնակարանների վիճակահանությունից հետո 3 օրվա ընթացքում շահառուն պարտավոր է մուծել ողջ գումարի 30 %-ի չափով կանխավճար, որից հետո միայն կնքվում է պայմանագիր:
Ծրագրի մասնակիցների ու կառուցապատողի հետ կայացած հանդիպման ընթացքում այս բոլոր մտահոգությունները հնչեցվել են, և դրան հետևել է կառուցապատողի կտրուկ արձագանքն ու մեկնաբանությունն առ այն, որ սա սոցիալական ծրագիր չէ և սահմանված պայմանները փոփոխման ենթակա չեն: Այնուամենայնիվ, 2 օր առաջ ԳԶՀ-ի կողմից տրամադրվել է նոր տեղեկատվություն, ըստ որի՝ բնակարանների վիճակահանությունից հետո գնորդներին առաջարկվելու է նաև կանխավճարը 20 օրում վճարելու տարբերակ՝ հիպոթեքային վարկ ստանալու նպատակով: Դժբախտաբար, սակայն, պայմանագրի ռիսկային կետերի որևէ վերանայում տեղի չի ունեցել, ավելին՝ ԳԶՀ-ը որևէ պարտավորվածություն չի սահմանել կառուցապատման ժամանակ սեփական միջոցներ ցույց տալու կամ ներդնելու մասին, չի սահմանել նաև որևէ մեխանիզմ՝ հիպոթեքային վարկի ստացմանն օժանդակելու իմաստով: Ենթադրվում է, որ աշխատակիցները այս բնակարանաշինական ծրագրից օգտվելու համար պետք է կարողանանան գրավադրել երկրորդ անշարժ գույք ՝ հիպոթեքային վարկ ստանալու համար:
Ակնհայտ է, որ սահմանված պայմանները բոլորովին չեն բխում Ակադեմիայի աշխատակիցների հնարավոր ռեսուրսների իրական գնահատումից, ծրագիրը չի ստանձնում որևէ սոցիալական պատասխանատվություն և առնվազն կասկածելի է, թե ինչքանով է կառուցապատումը առնչվում ԳԶՀ-ի՝ գիտությունը զարգացնելու պարտավորություններին:
Ակնկալում ենք Ձեր անմիջական միջամտությունը ԳԶՀ-ի այս նախաձեռնության մեջ գիտաշխատողների համար ողջամիտ պայմանների սահմանման հարցում՝ հաշվի առնելով, որ կառուցապատողը, նույնն է՝ ԳԶՀ, պատրաստակամ չէ գործարքից առաջ քննարկումների ու փոփոխությունների:
Միաժամանակ, կառուցապատողը/վաճառողը/ԳԶՀ-ը սահմանում է, որ նախատեսված պայմաններով վճարում չկատարելը հանգեցնում է ծրագրից ուղղակի դուրս մնալուն: Քանի որ վիճակահանությունը նախատեսված է 2019 թ. սեպտեմբերի 28-ին, ակնկալում ենք ներկայացված առաջարկությունների հետ կապված Ձեր գործուն միջամտությունը:
Մասնավորապես առաջարկում ենք՝
• Պարտադրել կառուցապատողին՝ նախատեսված պայմանները բխեցնել գիտաշխատողների շահերից, այլ ոչ թե բիզնես շահից, քանի որ նախաձեռնությունն իրականացնում է Գիտության զարգացման հիմնադրամը՝ Ակադեմիայի աշխատակիցների համար
• Պայմանագրում նախատեսել հստակ մեխանիզմներ՝ կառուցապատողի պարտավորությունների կատարման, դրանց նկատմամբ վերահսկողության ու խախտման դեպքերի համար
• Նվազեցնել առաջին կանխավճարի գումարը
• Պայմանագրում արտացոլել կառուցապատողի սեփական միջոցների ներդրման հարցը
• Որևէ արտոնյալ մեխանիզմ նախատեսել գույքի ձեռքբերման համար հիպոթեքային վարկի ստացման հարցում
• Սահմանել ողջամիտ ժամկետներ՝ հիպոթեքային վարկի համար դիմելու նկատառումներով
• Կառուցապատողին առաջարկել ուսումնասիրել ՀՀ-ում իրականացված սոցիալական բնակարանաշինության առավել հաջողված ծրագրերի փորձը՝ դրանք կիրառելու նպատակով։
Դիմող՝ ՀՀ ԳԱԱ Հնագիտության և ազգագրության ինստիտուտի ծրագրի շահառուների խումբ