ԵՐԵՎԱՆ, ՆՈՅԵՄԲԵՐԻ 4, 24News
ՀՀ Շրջակա միջավայրի նախարարության հասարակայնության հետ կապերի բաժնից տեղեկացնում են, որ փորձ է արվում նոյեմբերի 5-ին նախատեսված աշնանային համապետական ծառատունկի օրվա ընտրությունը քաղաքական ենթատեքստի տակ ներկայացնել։
«Հարգելի քաղաքացինե՛ր, զանգվածային լրատվության միջոցների հարգելի գործընկերնե՛ր,
Երեկվանից փորձ է արվում սույն թվականի նոյեմբերի 5-ին նախատեսված աշնանային համապետական ծառատունկի օրվա ընտրությունը քաղաքական ենթատեքստի տակ ներկայացնել։
Հարկ ենք համարում, տեղեկացնել, որ աշնանային համապետական ծառատունկի օրը ընտրվել է դեռ ամիսներ առաջ։
2022 թվականի աշնանային ծառատունկերի նախապատրաստական և տնկման աշխատանքներն արդեն իսկ ընթացքի մեջ են և շարունակվելու են մինչև նախատեսված ամբողջ քանակի տնկումը։
Համապետական ծառատունկի օրը հայտարարվել է սույն թվականի հոկտեմբերի 28-ին, իսկ նոյեմբերի 5-ին նախատեսվող հանրահավաքի մասին հայտարարվել է 2 օր անց՝ հոկտեմբերի 30-ն։
Ուստի, հորդորում ենք զերծ մնալ բնապահպանական այս կարևորագույն միջոցառման վերաբերյալ ակնհայտ ապատեղեկատվություն տարածելուց և հանրությանը միտումնավոր տեղեկատվական մանիպուլյացիաների ենթարկելուց»,- ասված է հաղորդագրության մեջ:
Ավելի վաղ հայտնել էինք, որ Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ը նոյեմբերի 5-ին՝ 10:30-ին, Ծիծեռնակաբերդի բարձունքում և Սարալանջում՝ 10 հեկտար տարածքի վրա կիրականացնի ծառատունկ:
Հիշեցնենք՝ խորհրդարանական ընդդիմությունը հայտարարել է, որ նոյեմբերի 5-ին հրավիրվում է մեծ հանրահավաք՝ հաջակցություն Արցախում օրեր առաջ հրավիրված հանրահավաքի: Երեկ մամուլում տարբեր հրապարակումներ արվեցին այն մասին, որ քաղաքապետարանը դիտավորյալ է որպես ծառատունկի օր ընտրել նոյեմբերի 5-ը՝ ընդդիմության հանրահավաքից ուշադրությունը շեղելու համար: Ընդդիմության արած հայտարարություններին անդրադարձել էր նաև Երևանի քաղաքապետարանը՝ նշելով, որ նոյեմբերի 5-ը ծառատունկի համաշխարհային օրն է և այն «քաղաքականացնելը» առնվազն անլուրջ է:
--00—ԻԴ