ԵՐԵՎԱՆ, ՀՈՒՆԻՍԻ 13, 24News
Հայաստանում նկատվում է գնաճի տեմպի դանդաղում, սպառողական շուկայում 12-ամսյա գնաճը կազմել է 1.3 տոկոս (2023-ի մայիսը 2022-ի մայիսի նկատմամբ), իսկ այս տարվա ապրիլի համեմատ նկատվել է 1.8 տոկոսով նվազում: Փորձագետի գնահատմամբ՝ առաջիկա ամիսներին ևս գնաճի տեմպը կշարունակի դանդաղել:
«Արմենպրես»-ի հաղորդմամբ՝ սննդամթերքի և ոչ ալկոհոլային խմիչքների գները մայիսին նախորդ տարվա մայիսի նկատմամբ նվազել են 2.1 տոկոսով: Իսկ միայն սննդամթերքի գները նվազել են 2.3 տոկոսով: Սննդամթերքի գները մայիսին նվազել են նաև նախորդ ամսվա՝ ապրիլի համեմատությամբ՝ 4.2 տոկոսով:
Իսկ, օրինակ, ալկոհոլային խմիչքների, ծխախոտային արտադրատեսակների գները մայիսին նախորդ տարվա մայիսի նկատմամբ աճել են 7.8 տոկոսով, հագուստի և կոշիկի գները՝ 6.2 տոկոսով:
Այս տարվա մայիսին նախորդ տարվա մայիսի համեմատ հացի գինը աճել է 0.2 տոկոսով, իսկ ապրիլի համեմատ նվազել է 1.4 տոկոսով: 2023-ի մայիսին նախորդ տարվա մայիսի համեմատ ալյուրի և այլ ձավարեղենի գները նվազել են 12 տոկոսով, բրնձի գինը նվազել է 7.8 տոկոսով, մակարոնեղենինը՝ 4.1 տոկոսով: Ձվի գինը, սակայն, նույն ժամանակահատվածում աճել է 18.9 տոկոսով, կարագինը նվազել է 2.9 տոկոսով, շաքարի գինը նվազել է 6.6 տոկոսով, իսկ մսի գինն աճել է 5.8 տոկոսով, ձիթապտղի յուղի գինը՝ 3.3 տոկոսով:
«Ամբերդ» հետազոտական կենտրոնի փորձագետ Հայկ Բեջանյանն այն կարծիքն է, որ Հայաստանում առաջիկա ամիսներին գնաճի տեմպը կշարունակի դանդաղել:
Անդրադառնալով գնաճի թուլացման պատճառներին՝ Բեջանյանը կարևորեց առաջնահերթ ուշադրություն դարձնել նախորդ տարվա բազային: «Նախորդ տարի մենք բավականին բարձր գնաճի ցուցանիշ ենք ունեցել: Եվ այս տարվա համեմատաբար կայուն միջազգային, կայուն տնտեսական զարգացումների արդյունքում նախորդ տարվա բարձր բազայի վրա այս տարվա գնաճի տեմպն ակնկալվում է, որ կլինի ավելի ցածր: Այդ ակնկալիքն ավելի հիմնավորվում է, երբ տեսնում ենք նվազման միտումը, որը ոչ թե անկախ վարքագիծ է դրսևորում, այլ ամսեամիս կանոնավոր նվազում է արձանագրվում: Եվ մենք ամբողջ տարվա ընթացքում ընդհանուր առմամբ կշարունակենք այդ գործընթացին ականատես լինել»,-«Արմենպրես»-ի հետ զրույցում ասաց Բեջանյանը:
Գնաճի ձևավորման գործում զգալի դերակատարում ունի նաև փոխարժեքի գործոնը: Եվ, ըստ փորձագետի, քանի որ արտարժույթը կայունացել է բավականին ցածր փոխարժեքի մոտակայքում, սա հիմք է հանդիսացել, որ այս տարվա արդյունքներով լինեն ավելի մեղմ գնաճային ակնկալիքներ, քան արձանագրվել է նախորդ տարվա ընթացքում:
Ընդ որում, գնաճի տեմպի դանդաղմանը զուգահեռ փորձագետն այս տարվա արդյունքներով սպառողական պահանջարկի կրճատում չի նկատում, ընդհակառակը՝ պահպանվել է և որոշակիորեն ակտիվացել՝ հատկապես զբոսաշրջիկների թվի ավելացմամբ պայմանավորված: Այս պահանջարկի պահպանումը ևս պատճառ է եղել գնաճային միջավայրի որոշակի կայունացման համար:
«Քանի որ նախորդ ամբողջ տարվա ընթացքում ունեցել ենք բավականին բարձր գնաճային միջավայր, ապա այս տարվա արդյունքներով շարունակելու ենք այդ նվազումն արձանագրել, որն ի վերջո կհանգեցնի գնաճի՝ բնականոն մակարդակի թիրախավորման: Այս տարի առաջիկա ամիսներին գնաճի տեմպը դեռևս կշարունակի դանդաղել, տարեվերջին գնաճի միջին ցուցանիշը, կարծում եմ, մոտ կլինի թիրախային մակարդակին»,-ասաց Բեջանյանը:
Իսկ հաջորդ տարիների համար հնարավոր կլինի գնահատումներ անել՝ կախված նրանից, թե ինչ զարգացումներ կլինեն, ինչ գործոններ ի հայտ կգան:
Նախորդ տարվա համադրելի ժամանակահատվածի համեմատ գնաճն ապրիլին եղել է 3.2 տոկոս, մարտին՝ 5.4 տոկոս:
--00--ԶՀ