ԵՐԵՎԱՆ, ՍԵՊՏԵՄԲԵՐԻ 14, 24News
82 տարեկան հասակում մահացել է Մոլդովայի առաջին նախագահ Միրչա Սնեգուրը։ Ինչպես «Արմենպրես»-ը տեղեկանում է «Интерфакс» գործակալությունից, այդ մասին հայտնել է հանրապետության առաջին խորհրդարանի պատգամավոր, նախկին փոխվարչապետ Կոնստանտին Տամպիզան։
Սնեգուրին կհուղարկավորեն Քիշնևի կենտրոնական գերեզմանատանը՝ կնոջ կողքին։
Միրչա Սնեգուրը Մոլդովայի նախագահն է եղել 1990 թ. սեպտեմբերի 3-ից մինչև 1997 թվականի հունվարի 15-ը։
Սնեգուրը ծնվել է 1940 թ. հունվարի 17-ին Ռումինիայի Սորոկա գավառի Տրիֆենեշտ գյուղում։ Ավարտել է Քիշնևի գյուղատնտեսական ինստիտուտը, դարձել գյուղատնտեսական գիտությունների դոկտոր և աշխատել գյուղատնտեսության ոլորտում, ինչպես նաև ղեկավար տարբեր պաշտոններ զբաղեցրել Մոլդովայի հյուսիսային շրջաններում։
1985-1989 թթ. աշխատել է Մոլդովայի Կոմկուսի Կենտկոմի քարտուղարի պաշտոնում։ Մինչև նախագահ դառնալը նա 1989-1990 թթ. եղել է Մոլդովայի ԽՍՀ Գերագույն խորհրդի նախագահության նախագահ և Մոլդովայի ԽՍՀ Գերագույն խորհրդի նախագահ։ Եղել է «Վերածնունդ և համերաշխություն կուսակցության» նախագահը։
2000 թ.-ին պարգևատրվել է Հանրապետության շքանշանով, արժանացել Քիշնևի գյուղատնտեսական համալսարանի (1996թ.), Անկարայի համալսարանի (1996թ.) և Մոլդովայի ազատ միջազգային համալսարանի (2001թ.) Doctor Honoris Causa-ի պատվավոր կոչման:
--00—ԼՀ