ԵՐԵՎԱՆ, ՄԱՐՏԻ 6, 24News
Բալասանյանի գրասենյակի մամլո ծառայության պատասխանատու Քրիստինե Նազարյան գրում է․
«Արցախի նախագահի թեկնածու, Արցախի հերոս, գեներալ Վիտալի Բալասանյանի նախընտրական հանդիպումներն Ասկերանի շրջանի գյուղերում շարունակվեցին նաև մարտի 5-ին։ Այսօր նա Պատարա, Խանցք, Դահրավ, Աստղաշեն, Հովսեփավան համայնքներում էր։ Ինչպես նախորդ հանդիպումներում, այստեղ էլ բարձրացվող հիմնական հարցը Արցախի անվտանգությունն էր։ «Արցախի հարցը երբևէ ռազմական ճանապարհով չի լուծվել և չի լուծվելու։ Մեր ժողովուրդն այս հողի վրա շատ խորն արմատներ ունի, և աշխարհի այն տերությունները, որոնք հանդես են գալիս Ադրբեջանի տարածքային ամբողջականության համատեքստում, հաջողություն չեն ունենալու։ Ցավով եմ ասում, բայց վերջին շրջանում, մանավանդ 1,5 տարում, այն քաղաքական գիծը, որը վարում է ՀՀ-ի քաղաքական իշխանությունը, պիտի արձանագրենք՝ հակահայ քաղաքականություն է։ Մեր՝ Արցախի Հանրապետության իշխանության և իմ բացթողումն էլ կա այստեղ»,- հայտարարեց Բալասանյանը։
Ապա նա ընտրողներին ևս մեկ անգամ հավաստիացրեց, որ շարունակելու է լինել իր տոհմի և ազգի նվիրյալ զինվորը. ծառայել և ծառայելու է Արցախին և Հայաստանին։ «Շարունակելու ենք պայքարել և թույլ չենք տալու քաղաքական առումով հարցը լուծել ոչ հայանպաստ ձևով։ Այդ 12.000 քմ կիլոմետրը մերն է թե՛ պատմական, թե՛ իրավական առումով։ Թե՛ Ադրբեջանի իշխանություններին, թե՛ մյուս երկրներին ունենք ներկայացնելու փաստեր՝ պատմական ապացույցները, որ մեր պատմական հայրենիքն ավելին է, քան այդ 7 շրջանները։ Իրավական առումով ևս այս տարածքները պատկանում են մեզ և մերն են լինելու։ Թույլ չենք տալու հողերը շահարկման առարկա դարձնել։ Համոզված եմ՝ ողջ հայությունն ինձ հետ համակարծիք է»,- ընդգծեց Բալասանյանը՝ հիշեցնելով իր և իր թիմի կարգախոսը՝ «Հաղթանակը չի վաճառվում»։
Այսօր՝ մարտի 5-ը, գեներալ-մայոր Վիտալի Բալասանյանի ծննդյան օրն է, և այդ առիթն օգտագործելով, նա ևս մեկ անգամ երդվեց հայրենակիցների առջև՝ լինել նվիրյալ զինվոր, պայքարել հանուն Արցախի և Հայաստանի անվտանգության և ապահովության։ «Ուզում եմ անկեղծ լինել. երբևէ խրամատը չեմ լքել և չեմ լքելու, ծառայել և ծառայելու եմ իմ ժողովրդին։ Լինելու եմ խրամատում այն ժամանակ, երբ վտանգ կսպառնա Արցախին և Հայաստանին։ Այսօր ևս մեկ անգամ, իմ ծննդյան օրվա կապակցությամբ, երդվում եմ իմ 5 թոռների և մեր բոլոր փոքրիկների անունով՝ ազնիվ ծառայել մեր երկրին»,- ասաց Բալասանյանը։
Գյուղացիների հետ հարցուպատասխանի ընթացքում Բալասանյանն անդրադարձավ նաև ադրբեջանական համայնքի վերաբնակեցման հայտարարություններին, նշելով, որ որևէ քայլ, որ կսպառնա արցախցիների անվտանգությանը, կասեցվելու է։ «Եկեք ևս մեկ անգամ համախմբվենք, թույլ չտանք մեզ տարանջատեն, թույլ չտա՛նք։ Կարճ ժամանակում մեր ուժերը համախմբենք, ներդնենք և այս վիճակից շուտ դուրս գանք։ 1988-ի փետրվարյան օրերից հետո մեր շրջանը եզակի է եղել, որ շատ արագ համախմբվեց և միաբանվեց, զորք ստեղծեց և ուղարկեց ճակատ։ Ու նվազագույն կորուստներով մենք հասանք մեծ հաջողությունների։ Եկե՛ք կրկնեք մեր հաղթանակը»,- կոչ արեց Բալասանյանը։ Հանդիպման ավարտին նա շնորհավորանքներ ստացավ ծննդյան օրվա կապակցությամբ»: