ԵՐԵՎԱՆ, ՆՈՅԵՄԲԵՐԻ 6, 24News
Նոյեմբերի 4-ի ժամը 17.30-ին ՆԳՆ ոստիկանության օպերատիվ կառավարման կենտրոն զանգած քաղաքացին հայտնել էր, որ Ազատության պողոտայի հարակից զբոսայգում կրակում են: Այս մասին հայտնում են ՆԳՆ ոստիկանական ծառայությունից։
Ոստիկանության Քանաքեռ-Զեյթունի բաժնից օպերատիվ խումբ և պարեկներ են մեկնել: Նրանք նշված վայրում նկատել են երեք երիտասարդների, որոնցից երկուսի ձեռքին ատրճանակի նմանվող առարկա կար: Երիտասարդները, ապօրինի զենք-զինամթերք պահելու և կրելու, ինչպես նաև խուլիգանության հիմնավոր կասկածանքով, ձերբակալվել և տեղափոխվել են Քանաքեռ-Զեյթունի բաժին:
Խուզարկությամբ երիտասարդներից մեկի պայուսակում հայտնաբերվել են «ՊՄ 49» տեսակի օդաճնշիչ ատրճանակ և նշված ատրճանակի համար նախատեսված 145 մետաղական գնդիկներ: Անձնական խուզարկությամբ «ՊՄ 49» տեսակի օդաճնշիչ ատրճանակ և նշված ատրճանակի համար նախատեսված 139 մետաղական գնդիկներ են հայտնաբերվել նաև մյուս երիտասարդի պայուսակում: Երիտասարդները հայտնել են, որ կրակում էին շշերի վրա:
Երիտասարդները և կազմված փաստաթղթերը ներկայացվել են նախաքննական մարմին:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
--00—ԼՀ