ԵՐԵՎԱՆ, ՄԱՐՏ 22, 24News
Նոր Զելանդիայում հազարավոր մարդիկ 2 րոպե լռությամբ հարգել են անցած շաբաթ Քրայսթչըրչ քաղաքի երկու մզկիթներում տեղի ունեցած ահաբեկչական հարձակման 50 զոհերի հիշատակը, հաղորդում է abc.net.au-ն:
Մարդիկ հավաքվել են ալ Նուր մզկիթի մոտ գտնվող Հեգլի այգում: Ուրբաթօրյա աղոթքը հեռարձակվել է երկրի ամբողջ տարածքում:
Զոհերի հիշատակին նվիրված երթին մասնակցել է Նոր Զելանդիայի վարչապետ Ջասինդա Արդերնը, մոտ 30 բարձրաստիճան պաշտոնյաներ, ինչպես նաև մահմեդական համայնքի ներկայացուցիչներ:
Աղոթքից հետո տեղի է ունեցել ահաբեկչության 26 զոհի զանգվածային հուղարկավորությունը:
Ավելի վաղ հաղորդվել էր, որ ահաբեկչական գործողությունից հետո մահմեդական ուրբաթօրյա աղոթքին ընդառաջ կրկին կբացվեն հարձակման թիրախ դարձած մզկիթները:
Օրեր առաջ Քրայսթչըրչի փողոցներում հազարավոր մարդիկ, ի նշան վշտի, պարել էին Նոր Զելանդիայի մաորի ցեղի ավանդական հակա ռազմապարը, որը պարում են թաղման ժամանակ՝ հարգանքի տուրք մատուցելով հանգուցյալին:
Հիշեցնենք, որ Քրայսթչըրչ քաղաքում տեղի ուենցած ահաբեկչական հարձակումը 50 մարդու կյանք էր խլել: Ահաբեկչության համար ձերբակալված 28-ամյա ավստրալացի Բրենթոն Տարանտին սպանության մեղադրանք է առաջադրվել: Նրա գործով հաջորդ դատական լսումը նշանակված է ապրիլի 5-ին, իսկ մինչ այդ նրան կշարունակեն կալանքի տակ պահել: Տարանտն իր արարքը բացատրել է Արևմուտքում ահաբեկչություն իրականացնող իսլամիստների դեմ վրեժխնդրությամբ: