ՀՀ ԱԳ նախարարի Եգիպտոս այցի մասին մի քանի դիտարկում․ Նարեկ Մինասյան

ԵՐԵՎԱՆ, ՍԵՊՏԵՄԲԵՐԻ 16, 24News 

․

ՀՀ ԱԳ նախարարի Եգիպտոս այցի մասին մի քանի դիտարկում. Ֆեյսբուքի էջում գրել է քաղաքագետ Նարեկ Մինասյանը:

Փաստացի գործնական կիրարկման փուլ է մտել ՀՀ նոր մերձավորարևելյան ռազմավարությունը, կամ, այլ կերպ ասած, Հայաստանը վերադառնում է Մերձավոր Արևելք:

Տեղի է ունեցել Մերձավոր Արևելքում ՀՀ պետական և ազգային շահերի վերաձևակերպում և տարածաշրջանային նոր իրողությունների վերագնահատում, ինչը հիմքեր է ստեղծել նախկին չեզոք, կրավորական կեցվածքը առավել պրոակտիվ և նախաձեռնողական քաղաքականությամբ փոխարինելու:

Եգիպտոսի ընտրությունը որպես մեկնակետ պատահական չէ և պայմանավորված է մի կողմից հայ-եգիպտական ավանդական հարաբերություններով, մյուս կողմից՝ տարածաշրջանում, արաբական աշխարհում Եգիպտոսի մեծ կշռով ու դերակատարմամբ:

ՀՀ ԱԳ նախարարի այցը հաջողված էր. այն նպատակ ուներ հիմքեր ձևավորել հայ-եգիպտական հարաբերությունները նոր մակարդակի բարձրացնելու համար, ինչի արտահայտությունը կդառնա Եգիպտոսի նախագահ ալ-Սիսիի նախատեսվող այցը Հայաստան (համարժեք օրակարգով):

Եգիպտոսը ևս հետաքրքրված է Հայաստանի հետ հարաբերությունների խորացմամբ, ինչի վառ արտահայտությունն էր երկրի նախագահի մակարդակով ՀՀ ԱԳ նախարարի ընդունելությունը (ոչ հաճախ հանդիպող երևույթ): Ընդհանուր շահերը շատ բազմազան են՝ ԵԱՏՄ-Եգիպտոս ազատ առևտրի համաձայնագրից (ի դեպ, ԵԱՏՄ անունից հենց Երևանն է բանակցում) մինչև տարածաշրջանում Թուրքիայի ոչ կառուցողական քաղաքականության հակազդում և այլն:

ՀՀ մերձավորարևելյան քաղաքականության կարևոր ուղղություններից է դառնում կրոնական փոքրամասնությունների իրավունքների պաշտպանության խնդիրը, և այս առումով Եգիպտոսում մի շարք հոգևոր առաջնորդների հետ հանդիպումները  հետաքրքրական էին:

Մերձավորարևելյան ուղղությամբ ակտիվացումը հայկական դիվանագիտության առաջիկա ամիսների առաջնահերթություններից է, և նախատեսվում են այլ այցեր ևս՝ ԱՄԷ, Լիբանան, Իրաք, Հորդանան, Սիրիա և այլն:

--00--ԱՀ

Տեսանյութեր

Live

Լրահոս