ԵՐԵՎԱՆ, ԱՊՐԻԼԻ 27, 24News
ՀՀ նախագահի խորհրդական Թևան Պողոսյանը ֆեյսբուքյան էջում գրառում է արել Հայաստանի ու Արցախի ապագայի մասին՝ ընդգծելով, որ ճանապարհը պետք է ապահովել ազգային արժեքների և ազգային պետության տանող ճանապարհի միասնությամբ։
«Արցախցիներին այսօր օդի ու ջրի պես անհրաժեշտ է ոգևորիչ խոսք, ապագայի խոսք, հաղթանակների խոսք․ հետպատերազյան հոգեբանական շոկերը սկսել են գլուխ բարձրացնել, դեմը եթե չառնենք շատ վատ արդյունքներ ենք ունենալու։ Դա պետք է արվի ազգային արժեքների միասնության և ազգային պետության տանող ճանապարհի միասնությամբ` համայն հայությամբ։ Իրականում նույն է սյունեցիների և ամբողջ Հայաստանի համար։
Հուսամ, որ օր առաջ կգիտակցենք մեր ցանկացած քայլի արդյունքը և հունիսի 20-ից նոր առաջնորդությամբ առաջ կշարժվենք։ Գործողներն իրենց ազգակործան մոտեցումներով պետք է հեռանան։ Իսկ մենք հասկանանք, որ շատ դժվարին, քարքարոտ և երկար, դեռ ոչ բարեկեցիկ ճանապարհ պետք է անցնենք՝ ապահովելու մեր ազգային երազանքները։
Բայց առաջին քայլը ոգին է, հետպատերազմյան շոկի դեմն առնելը և անվտանգության ամրապնդումը։
Հողի գինը իմացող է պետք, Հայրենիքի գինը իմացող, ազգայինին և մեր պապական արժեքներին վերադարձ է պետք։
Մեր պատերազմը չի ավարտվել և ամեն օր էլ ընթանում է։ Գոնե այս մեկը ազգովի ընկալենք Հայրենական»,-գրել է Թևան Պողոսյանը։
--00—ԼՄ